دفاع وزارت ویلي، چې د نورستان د کامدیش ولسوالۍ په استقامت د ډیورند فرضي کرښې له هغې غاړې څخه د افغانستان پر لوري د ناامنۍ جوړولو په موخه د څو ډلو د را اوښتو هڅه شوې، چې د افغان امنیتي او دفاعي ځواکونو په عملیاتو کې یې ۲۸ غړي وژل شوي او ۳۲ نور ژوندي نیول شوي دي.
په خبرپاڼه کې ویل شوي، چې یاد کسان د پاکستاني ملیشو په ملاتړ او تشویق د داعش او «شر او فساد» د عناصرو په ګډون په څو ډلو کې افغانستان ته را اوښتي وو، چې سخت ځپل شوي او بېرته د پاکستاني ملیشو مرکزونو ته تښتېدلي دي.
خبرپاڼه زیاتوي، چې په دغو ډلو کې پاکستاني ملیشې، پاکستاني اربکیان او داعش وسله وال هم موجود وو، خو د جګړې له پیل سره یې د «شر او فساد» عناصر پرېښي او بېرته تښتېدلي دي.
د وزارت په وینا، په دې هڅه کې کارول شوي ډېری کسان د تېرې ادارې پخواني نظامیان وو چې د پاکستاني استخباراتو له لوري پاکستان ته انتقال شوي او بیا په جوړو شویو کمپونو کې له لنډو نظامي زدهکړو وروسته نورستان ته استول شوي وو.
وزارت ویلي، د سیمې هېوادونه باید متوجه وي چې د پاکستاني پوځیانو له لوري د جګړو د صادرولو، د ناامنیو لپاره د وسلهوالو د روزنې او نورو هېوادونو ته د هغوی د لېږلو هڅې د ټولې سیمې د ناامنه کولو لامل کېدای شي.