د هرات ولایت مقام رسنیز دفتر خبر ورکړی، چې د عامې روغتیا وزارت د سرپرست او د دغه ولایت د محلي چارواکو په شتون کې د افغانستان په کچه د لومړي ۴۰۰ بستریز فوق تخصصي ماشومانو روغتون د بنسټ ډبره ایښودل شوې.
د عامې روغتیا وزارت سرپرست په همدې پار جوړو شویو مراسمو کې ویلي، چې هڅه کوي تر څو د افغانستان په ټولو سیمو کې کیفیت لرونکي روغتیایي خدمتونه برابر کړي او په همدې موخه دا وزارت پلان لري چې د هېواد په ۳۱۸ ولسوالیو کې کلینیکونه جوړ کړي، څو په ټولو سیمو کې خدماتو ته لاسرسی زیات شي.
ویل شوي، چې د «عبدالظاهر بشیري» په نوم ۴۰۰ بستریز فوق تخصصي ماشومانو خیریه روغتون، چې د هېواد په کچه تر ټولو لوی روغتون ګڼل کېږي، پر۲۰ زره متره مربع ځمکه په اته پوړونو کې جوړ شي.
سرچینې زیاته کړې، چې دا روغتون به د نړیوالو معیارونو پر بنسټ جوړ او په کې به د ځانګړې پاملرنې څانګه، د زړه درملنې، مجهز لابراتوار، د وینې بانک او د مشورې مرکز شامل وي.