والسټریټ ژورنال راپور ورکړی، چې د سپینې ماڼۍ لوړپوړو چارواکو ډونالډ ټرمپ ته ویلي چې د ایران مقاومت ښايي له دغه هېواد سره جګړه تر ۲۰۲۹ کال پورې وغځوي، چې د نوموړي د ژر بریا او د جګړې د پای ته رسېدو له څرګندونو سره په ټکر کې ده.
راپور وايي، جيډي ونس، مارکو روبیو او نورو چارواکو په خصوصي خبرو کې د ایران د مقاومت او د خپلو توغندیو، ډرونونو، رادارونو او نورو پوځي تجهیزاتو د بیا جوړولو وړتیاوو په اړه اندېښنه څرګنده کړې ده.
والسټریټ ژورنال زیاتوي، د جګړې اوږدېدل ښايي د امریکا پر پوځي سرچینو فشار زیات او د نړیوال نفتو بازار له اوږدمهاله ګډوډۍ سره مخ کړي. د راپور له مخې، تر اوسه په جګړه کې ۱۸ امریکايي پوځیان وژل شوي دي.