د پاکستان تحریک طالبانو د ملګرو ملتونو د امنیت شورا د وسله والو ډلو څخه د څار کمېټې ۳۳ راپور ته په غبرګون کې ویلي، چې دوی هیڅ بهرنۍ اجنډا نه لري او نه هم د کوم نړۍوال وسله وال تنظیم یا ډلې سره اړیکې لري.
ټي ټي پي د یوې خبرپاڼې په خپرولو سره ویلي، چې دوی دغه مبارزه د خپل هېواد د سلګونو علماوو د فتوا په رڼا کې پیل کړې، چې موخه یې په خپل هېواد کې د شرعي نظام رامنځ ته کول او حاکم کول دي.
د ملګرو ملتونو د امنیت شورا د وسله والو ډلو څخه د څار کمېټې په خپل وروستي ۳۳ راپور کې ویلي، چې د پاکستان د تحریک طالبانو وسله والې ډلې ته د القاعدې شبکې لخوا فکري او عقیدوي روزنه ورکول کېږي او مشر ته یې د افغانستان اسلامي امارت یا افغاني طالبانو لخوا هره میاشت څه باندې درې نیم میلیونه کالدارې ورکول کېږي.
ټي ټي پي دغه ادعاوې رد کړي او په خپره کړې خبرپاڼه کې یې د ملګرو ملتونو د امنیت شورا وروستي راپور کې پوری شوی تور پروپاګنډ ګڼلی او زیاته کړې یې ده چې دوی ته د هیڅ بهرنۍ ډلې لخوا فکري او عقیدوي روزنه نه ورکول کېږي او دوی د پاکستان د سلګونو علماوو په فتوا وسله وال جهاد پیل کړیدی.
ټي ټي پي زیاته کړې ده: ” د يادې کمېټې ادعا خو ډېره د تمسخر وړ ده، چې ګواکې د اسلامي امارت يا افغاني طالبانو له لوري د تحريک طالبان پاکستان محترم امیر ابو منصور عاصم (نور ولي محسود) ته په مياشتني ډول پینځه دېرش لکه روپۍ ورکول کېږي، موږ خپل لګښت په خپل هېواد کې له شرعي عایداتي سرچینو او د خپل ملت له مرستو تر لاسه کوو.”
یاده دې وي، په دې وروستیو کې د تحریک طالبان پاکستان وسله والې ډلې په پاکستان کې خپلو بریدونو ته زور ورکړیدی او د خپلو عملیاتو لمن یې پراخه کړېده