د ازموینو ملي اداره، د پوهنې وزارت او د ازموینو ملي ادارې ترمنځ د ښوونکو د گمارنې په موخه هوکړهلیک لاسلیک شوی دی.
له یادې ادارې څخه په خپره شوې خبرپاڼه کې ویل شوي، د دغه هوکړهلیک له مخې به د پوهنې وزارت اړوند ښوونځیو لپاره له ۴۰ زرو ډېر نوي ښوونکي وگمارل شي.
د ازموینو ملي ادارې مشر عبدالباقي حقاني ویلي، د دغه هوکړهلیک موخه د هېواد ښوونې او روزنې پیاوتیا ته د حکومت ځانگړې پاملرنه ده.: «د وړ او مسلکي ښوونکو په گمارنې سره به د پوهنې ډگر پیاوړی شي او ځوانانو ته به کیفیت لرونکې ښوونیزې زمینې برابرې شي.»
د ښاغلي حقاني په خبره، د علم نعمت له ټولو نعمتونو پورته دی او د همدې اصل په پیاوړتیا سره هېواد کولی شي په ځان بسیا او سیال وگرځي.: «اوسمهال هېواد کې د ښوونځي، نصاب، استاد او زدهکړو معیاري کېدو ته جدي اړتیا ده او ازموینو ملي اداره په دغه برخه کې د پوهنې وزارت سره پوره همکاري کوي، څو د رڼو ازموینو له لارې مسلکي او مستعد ښوونکي یاد وزارت ته وروپېژني.»
نوموړي هیله ښودلې، چې دغه هوکړهلیک به د هېواد د ښوونیز، تحصلیي او په ټوله کې د پوهنیز ډگر لپاره گټوره ثابته شي.
د پوهنې وزارت مالي او اداري مرستیال صبغت الله وصیل دغه هوکړهلیک د هېواد د ښوونې په برخه کې گڼې ستونزې هوارې کړي.
«د دې لپاره چې په تعلیمي برخه کې د مسلکي ښوونکو کمښت له منځه ولاړ شي، پوهنې وزارت لازمه وگڼله چې د ازموینو ملي ادارې له لوري د ښوونکو استخدام په شفافه توگه ترسره شي او وړ اشخاص اړوند ښوونځیو ته وروپېژندل شي.»
نوموړي ویلي، د اسلامي امارت له راتگ وروسته دا دویم ځل دی چې د پوهنې وزارت په چوکاټ کې د ښوونکو بستونه په ډلهییزه توگه اعلان ته سپاري او د گمارنې بهیر یې د ازموینو ملي ادارې له لوري پر مخ وړي.
د وصیل په خبره، په ټول هېواد کې به له ۴۰ زرو زیات بستونه اعلان ته سپاري، خو اوس مهال به د کابل لپاره ۲ زره او د کندهار لپاره ۵ زره بستونه اعلان ته وسپاري.
په هېواد کې د ښوونکو لپاره د نورو مامورینو په پرتله امکانات کم دي او زرگونه ښوونکي لا هم مسلکي شوي نه دي. ډېری لېسانس ځوانان غواړي چې په نورو ادارو کې دندې ولري او د ښوونکي دندې ته څوک زړه نه ښه کوي.
د ښوونیزو چارو کارپوهان وايي، که حکومت د ښوونکو امتیازات لوړ کړي، نو ډېر وړ ځوانان به هم د ښوونکي دندې لپاره حاضر شي او له دې سره به هېواد ښوونیز نظام هم پرمختگ وکړي.