د ایران د تسنیم خبري اژانس د یوه ځانګړي راپور له مخې، د سپاه پاسداران ویاند برید جنرال محبي ادعا کړې، چې د جولای له ۸مې تر ۲۲مې پورې د ایران د وسلهوالو ځواکونو د بریدونو په پایله کې د امریکا پوځ ته درانه زیانونه اړولي دي.
محبي ویلي، د دغو بریدونو په ترڅ کې د امریکا د پوځي زیربناوو په بېلابېلو برخو کې ګڼ شمېر تاسیسات زیانمن شوي، چې پکې د هوايي دفاع، رادار، لوژستیک او عملیاتو مرکزونه شامل دي.
د راپور له مخې، د امریکا د راداري او هوايي دفاع په برخه کې ۷ د قوماندې او کنټرول مرکزونه، ۳ د سپوږمکۍ مخابراتي سیستمونه، ۶ د پاتریوټ هوايي دفاع رادارونه، ۸ د لومړني کشف او خبرتیا رادارونه، ۷ د هوايي دفاع رادارونه، ۵ اوږد واټن رادارونه او یو شمېر نور راداري سیستمونه زیانمن شوي دي.
تسنیم د سپاه پاسداران له قوله ویلي، چې د امریکا د پوځي ملاتړ او لوژستیک په برخو کې یې هم ۶ د جنګي الوتکو او چورلکو د ساتنې مرکزونه، ۳ لوژستیکي مرکزونه، ۱۲ د تیلو زېرمې، ۱۷ د وسلو او پوځي پرزو ذخیرې او ۶ د توغندیو زېرمې په نښه شوې دي.
د راپور له مخې، په عملیاتي تاسیساتو کې ۶ د MQ-9 بېپیلوټه الوتکو هنګرونه، د F-15 جنګي الوتکې د چمتووالي مرکز، د P-8 الوتکې هنګر، ۴ د HIMARS توغندیو مرکزونه، ۵ د جنګي الوتکو هنګرونه، ۴ د پاتریوټ دفاعي کمپلکسونه، ۶ د توغندیو د توغولو مرکزونه، د استخباراتي معلوماتو یو مرکز او د مصنوعي ځیرکتیا یو مرکز هم د زیانمنو شویو ځایونو په لړ کې یاد شوي دي.
محبي همداراز ادعا کړې، چې د هوايي عملیاتو په برخه کې ۱۱ جنګي الوتکې او چورلکې، ۱۷ بېپیلوټه الوتکې، یوه F-15 جنګي الوتکه، یوه P-8 الوتکه، یوه C-17 ترانسپورتي الوتکه، ۸ د سونګ رسونې الوتکې او ۴ درنې چورلکې زیانمنې شوې دي.
تسنیم ویلي، دغه معلومات د سپاه پاسداران د یوه چارواکي له قوله خپاره شوي، خو د دغو ادعاوو په اړه د امریکا له لوري تر اوسه خپلواک تائید نه دی خپور شوی.