ار ټي عربي راپور ورکړی، چې اسرائیل د ایران وروستیو بریدونو له امله د غزې ټولې لارې او معبرونه تر نامعلومې مودې پورې تړلي دي.
که څه هم اسرائیلي چارواکي وايي چې دا پرېکړه به پر بشري وضعیت اغېز ونه کړي او غزې ته کافي خوراکي مرستې رسېدلې دي، خو د ملګرو ملتونو او بشري سازمانونو راپورونه ښيي چې په غزه کې لا هم د خوراکي توکو، پاکو اوبو، روغتیايي خدمتونو، درملو او سون توکو سخت کمښت شتون لري او زرګونه کسان له جدي ستونزو سره مخ دي.
نړیوالو بشري ادارو خبرداری ورکړی چې که د مرستو رسېدو مخه د اوږدې مودې لپاره ونیول شي، د غزې شاوخوا ۲.۳ میلیونه اوسېدونکو بشري وضعیت به لا پسې خراب شي.