د ايران ولسمشر مسعود پزشکيان پر اسرائیل د ايران له بريدونه پای ته رسېدو وروسته په خپله اېکس پاڼه لیکلي، چې لومړیتوب یې د ملي امنیت ساتنه او د خلکو ارامي ده او تهران به د خپلو ملي ګټو او د ملت له حقونو په کلکه دفاع وکړي.
پزشکیان ټینګار کړی، چې ایران به د هېڅ ډول ګواښ پر وړاندې شاتګ ونه کړي او د خپلو حقونو د دفاع لپاره به په پوره ځواک دریځ خپل کړي.
هغه زیاته کړې چې ډېپلوماسي او دفاع د ایران د ملي ځواک دوه مهم بنسټونه دي او هېواد یې نه له ډېپلوماټیکو هڅو لاس اخیستی او نه هم د دفاعي چمتووالي له ډګره وتلی دی.
پزشکیان څرګنده کړې چې هېواد به د یووالي، عقلانیت او ملي همغږۍ په مټ له روانو ننګونو او ازموینو څخه هم بریالی ووځي.