د بهرنیو چارو وزارت په یوه خبرپاڼه کې ویلي، چې د یاد وزارت وزیر مولوي امیرخان متقي نن په کابل کې د ایران د کرنې له وزیر غلام رضا نوري سره کتلي او د دواړو هېوادونو ترمنځ یې د اقتصادي او ټرانزیټي همکاریو د پراختیا په اړه یې خبرې کړې دي.
په دې لیدنه کې د دوهاړخیزو اړیکو د پیاوړتیا ترڅنګ، د اقتصادي او ټرانزیټي همکاریو د عملي بهیر، شته فرصتونو او د افغانستان او ایران د ګډ اقتصادي کمیسیون د اوومې ناستې د ترسره کېدو په اړه هم بحث شوی.
مولوي امیرخان متقي د دواړو هېوادونو ترمنځ د اقتصادي او ټرانزیټي همکاریو له روان بهیر څخه رضایت څرګند کړی اویلط یې دي، چې د افغانستان او ایران ترمنځ د همکاریو د پراختیا لپاره لا هم ګڼ ظرفیتونه او فرصتونه موجود دي.
د ایران د کرنې وزیر غلام رضا نوري هم په بېلابېلو برخو کې د شته همکاریو د پراختیا پر اهمیت ټینګار کړی او د دواړو هېوادونو ترمنځ یې د اقتصادي اړیکو د لا پراخېدو لپاره له موجودو فرصتونو څخه د اغېزمنې ګټې اخیستنې غوښتنه کړې.