یو وخت داسې و چې شوروي اتحاد د نړۍ زبرځواک بلل کېده. شوروي اتحاد په نړۍ کې هغه مهال یوه لویه امپراطوري تأسیس کړې وه، په ورته وخت کې یې د کمونیزم الحادي مفکوره پر مخ وړله، د دې لپاره یې پر مختلفو هېوادونو یرغلونه وکړل چې له دې جملې یو هم افغانستان و.
افغانستان د خپل ستراتیژیک موقعیت په درلودلو سره د نړۍ ټولو زبرځواکونو ته مهم ثابت شوی دی. د مهم والي یو بل دلیل یې دا هم ګڼلای شو چې دلته له پخوا په اسلامي عقیده سمبال مسلمانان شتون لري، چې د اسلامي دعوت په لار کې کار کوي.
شوروي اتحاد د ۱۳۵۸هـ ش کال د جدي پر ۶ مه د افغانستان پر پاک حریم تېری وکړ. دې یرغل نه تنها دا چې د افغانستان ځمکنۍ بشپړتیا یې نقض کړل، بلکې د افغان مسلمانانو ولس عقیدوي بدلون یې هم هدف و. افغانان لا وړاندې د دوی د لاسپوڅو په ضد درېدلي وو؛ کله چې یرغل وشو نو د افغانانو جذبه لا زیاته او او پیاوړي شول، په نشت امکاناتو یې د هېواد په ګوټ ګوټ کې د یرغلګرو او د هغوی د لاسپوڅو په وړاندې اسلحې ته لاس کړ.
شوروي اتحاد د دې لپاره چې خپل یرغل مشروع وښیي، د افغانان له جملې یې هغه خلک چې له پخوا د کمونیزم نظریې تر تأثیر لاندې وو، د واک پر ګدۍ کېنول. دا کسان چې مخکښې څهرې یې نور محمد تره کی، حفیظ الله امین، ببرک کارمل او ډاکتر نجیب و، په ولس کې منفور شوي وو. دوی په هېواد کې هېڅ محبوبیت نه درلود او د خپلو جنایاتو له کبله په ولس کې کرکه ترې کېده.
سرو لښکرو چې د افغانانو لږ مقاومت ولید، د افغانستان پر خلکو یې خپل وحشیانه بریدونه پیل کړ، افغانستان یې په ګنډواله بدل کړ، میلیونونه وګړي یې مهاجرت ته مجبور کړل. شخصي او عام المنفعه شتمنۍ لکه ځمکې، ځنګلونه، مکاتب، پوهنتونونه، مدارس، روغتونونه او مسجدونه یې د خپلو بریدونو هدف وګرځول. سرو لښکرو په زرګونه افغانان په زندانونو او خاد په ریاستونو کې ترې تم کړل.
د شوروي یرغلګرو لاسپوڅي هم تر دوی په ظلم او وحشت کې کم نه وو. سرې لښکرې بهرني یرغلګر وو، د هغوی لپاره ظلم عادي خبره وه، خو افغان متحدینو یې بیا تر دوی لا زیات جنایات ترسره کړل، چې په هېڅ صورت افغانانو ته د منلو نه وو.
شوروي یرغلګر د دې تر څنک په پراخو جنګي جرمونو ککړ و، جنګي بندیان یې په ډېره بې رحمۍ سره وژل، د جګړې په جریان کې یې پر ماشومانو، مېرمنو او سپین ږیرو هم لاس پورته کاوه. دوی د افغان ولس په وړاندې هغه ظلمونه او وحشتونه ترسره کړل چې تر دې وړاندې هیڅ چا نه وو ترسره کړي، خو افغانان د خپل ایماني قوت په مټ د دې هرې ستونزې په وړاندې محکم شول او سور ښامار یې مات کړ.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
