یو برېتانوي څېړنیز شرکت ویلي، په افغانستان کې د کوکنارو کښت په بېساري ډول کم شوی دی، چې په تېرو کلونو کې یې اټکل هم نه کېده.
یاد شرکت په خپل راپور کې ویلي، سږ کال په افغانستان کې د کوکنارو کښت دومره لږ و، چې په تاریخ کې ساری نهلري.
یاد شرکت ویلي، د سپوږمکۍ څخه په لوړ کیفیت اخیستل شوو انځورونو کې ښکاري، چې د کوکنارو کښت د کموالي لامل د طالبانو له لوري په دغه بوټي بندیز لگول دي.
الکېس څېړنیز شرکت ویلي، دوه کاله وړاندې طالبانو د کوکنارو په کښت بندیز ولگاوه، چې له امله یې په هغو ولایتونو کې هم د کوکنارو کښت صفر شو، چې له نورو ولایتونو په پرتله پکې ډېر کوکنار کرل کېدل.:«هلمند، کندهار، فراه، روزگان، ننگرهار او بغلان هغه ولایتونه وو چې ډېر کوکنار پکې کرل کېدل؛ خو اوس په یادو ولایتونو کې هم د کوکنارو کښت صفر شوی.»
په راپور کې ویلي، په همدې ۱۴ ولایتونو کې په ۲۰۲۲ کال کې په ۲۰۱۷۲۵ هکتاره ځمکه کې کوکنار کرل شوي وو چې د افغانستان د ټولو کوکنارو د کښت ۹۲ سلنه کېږي. خو په همدې ولایتونو کې بیا په ۲۰۱۹ کال کې ۲۱۹۹۷۸ هکتار ځمکه کې دا بوټي کرل شوي وو چې د تریاکو او نورو نشهيي توکو په جوړیدو کې ترې کار اخیستل کېږي.:«د طالبانو د بندیزو له کبله په ۲۰۲۳ز کال په همدې ۱۴ ولایتونو کې په ۱۵۶۴۸هکتاره ځمکه کوکنار کرل شوي وو، چې د پرو سږکال په پرتله پکې ۵۰ په سلو کې کموالی راغلی. په روان ۲۰۲۴ز کال کې بیا یوازې په ۳۶۴۱هکتاره کوکنار کرل شوي وو، چې سږکال د اټکل له مخې د کوکنارو کښت دومره لږ و چې په تاریخ کې ساری نه لري.»
یاد شرکت ویلي، سږ کال د بدخشان په ځینو سیمو کې کوکنار کرل شوي وو، چې گڼ یې له منځه یوړل شول.
الکېس څېړنیز شرکت خبرداری ورکړی، که افغان بزگرانو سره د معیشت بدیل لپاره مرسته ونهشي، نو له نورو کرنیزو توکو خپلې اړتیاوې نهشي پوره کولی او مجبورېږي چې بیا د کوکنارو کرکېلې ته مخه کړي.
د افغان حکومت گڼو وزیرانو هم په وار ـ وار ویلي چې دوی په هېواد کې د کوکنارو کښت صفر ته راټیټ کړ؛ خو نړیوالې ټولنې افغان بزگران هېر کړي او هېڅ ډول مرسته ورسره نه کوي.
