د امریکا او ایران ترمنځ د کړکېچ له زیاتېدو سره، واشنګټن اسرائیلو ته د هوايي سونګ رسولو لسګونه اضافي الوتکې استوي، ترڅو د احتمالي پوځي عملیاتو لپاره د اسرائیلو هوايي وړتیا نوره هم پیاوړې کړي.
د راپورونو له مخې، دا مهال شاوخوا د هوايي سونګ رسولو ۶۰ امریکايي الوتکې د اسرائیلو په بن ګوریون او رامون هوايي ډګرونو کې ځای پر ځای شوې دي او ټاکل شوې په راتلونکو ورځو کې نورې هم ورسېږي. سپینه ماڼۍ هم د ایران پر اټومي تاسیساتو او نورو مهمو زیربناوو د احتمالي بریدونو په ګډون بېلابېل پوځي انتخابونه ارزوي.
بل لور ته، ایران د امریکا وروستي اقدامات پاروونکي بللي او خبرداری یې ورکړی، که هر ډول برید پرې وشي، سخت او متقابل ځواب به ورکړي او د امریکا او د هغې د متحدینو ګټې به په سیمه کې په نښه کړي.
دا ناندرۍ په داسې مهال دي، چې د هرمز تنګي امنیتي وضعیت هم ورځ تر بلې ترینګلی کېږي او د منځني ختیځ د پراخې جګړې په اړه اندېښنې زیاتې شوې دي.