د ځانژغورنې لپاره ملت ځان ته ډال ګرځول
ځینې انسانان د ریښتینې مېړانې جوهر نه لري؛ دوی یواځې په ژبه ځانونه زړور ښکاره کوي او په ډاګیزه توګه د قدرت ننداره کوي، خو په حقیقي جګړه کې او د مېړانې د ښودلو پر مهال، د زړورتیا او جرات هېڅ نښه په کې نه موندل کېږي.
دا خلک تل د دوکو او فریب تر نقاب لاندې ځانونه پټوي او یواځې هغه وخت چې په بشپړ امن او آرامۍ کې وي، په لوړ غږ خبرې کوي او ځانونه زړور ښیي.
همدغسې بېزړه کسان تل هڅه کوي چې خلک او عامه وګړي د وینو ډک میدانونو ته ور ټېل وهي او هغوی د خپلو پوچو، بې بنسټه او ناسمو هدفونو قرباني کړي.
دا فرصتطلب او خودغرضه کسان له خلکو څخه د ځان د دفاع او ساتنې لپاره د سپر په توګه استفاده کوي او خپل ځانونه د پردې شا ته پټ ساتي؛ د دې لپاره چې د عدالت تر منګولو لاندې را نه شي او په عام محضر کې حساب کتاب ته مجبور نه شي، تل د تېښتې لار په نظر کې لري.
دا د باغیانو ستره ډله نه د زړورتیا په ښوونځي کې زدهکړې لري چې څوک پرې وفا او مخکښي باندې باور وکړي، او نه هم د ایثار په لار تېر شوي چې خلک یې پر مېړانه او غیرت حساب وکړي.
که یو سرسري حساب ترسره کړو، پوهېږو چې ټول هغه یاغي مشران چې ټول عمر یې په دې پاکه خاوره کې د باطل په صف کې جګړې کړې وې او وسله یې اخیستې وه، د فتحې او بریا له لومړیو نښو سره سم یې د تېښتې لار غوره کړه او خپلو ټولو مليپالو او خیالي آرمانونو ته یې شا کړه؛ هغوی حتی له حسرت او افسوس څخه ډک نظر هم خپل شا ته او هغه ملت ته چې هغوی یې ښکېل کړي او بیا پرېښي وو، ونه غورځاوه.
له دغسې مکاره او فریبکاره خلکو څخه څه تمه کېدای شي؟ او په کوم قیمت یو څوک خپل ځان په خطر کې واچوي او خپله سینه د دوی د دفاع لپاره سپر کړي؟!ریښتینی سړی هغه دی چې حتی په مغلوبېدلو او شکست کې هم په مېړانه ولاړ وي او د خپلو هدفونو لپاره خپل ژوند قرباني کړي تر څو خپلو ملګرو او همسنګرانو ته د مقاومت او استقامت سمبول وګرځي.
همداسې د دوی ملګري او همسنګر هم ځواک او قوت ترلاسه کوي او په ټینګه او پیاوړتیا سره خپل لاره تعقیبوي، که څه هم هغه لاره چې دوی غوره کړې، ناسمه او غلطه وي.
خو همدغه ناسموالی او غلطوالی د هدف او د پایلې تورتم او د انجام ناڅرګندتیا ده چې د ټولو زړونه لړزوي او ذهنونه یې نهشي ارامولی.
له همدې کبله، د خپل ژوند د ژغورلو په خاطر او د اوږد عمر په تمه او له خپلو شتمنیو او پانګو څخه د ګټې اخیستلو لپاره، په یوه شېبه کې غیبېږي او په ناڅاپي توګه د لویدیځو هېوادونو په یوه ناڅرګند ځای کې راښکاره کېږي.
په دغسې شرایطو کې، باید عام خلک په فکرمندۍ سره ګام واخلي او د داسې خلکو او لارو په لټه کې شي چې هم د الله رضا په کې وي او هم د هغه هدف لپاره خپل ژوند ورکول هغوی ته د تلپاتې عزت او شرف لامل شي.
نه دا چې د هغو خلکو په کاروان کې شامل شي چې حتی له خپل ځان سره هم پاک حساب نه لري او د خپل مقصد په اړه مطمئن نه دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
