د سرحدونو، قومونو او قبایلو چارو وزارت ویلي، چې د یاد وزارت د سرحدي پلټنو معین مولوي عنایتالله شجاع په مشرۍ په بدخشان ولایت کې د اسلامي شریعت د احکامو د نفاذ او ولسي همغږۍ په موخه پراخه غونډه شوې، چې دیني عالمانو، قومي مشرانو، سپینږیرو او عامو خلکو پکې ګډون کړی و.
د وزارت د معلوماتو له مخې، مولوي عنایتالله شجاع په غونډه کې د بدخشان د خلکو تېرو قربانیو او سرښندنو ته په اشارې ویلي، چې د خلکو ستونزو ته رسېدنه او خدمت کول اړین دي او په دې برخه کې به تر خپلې وسې هڅې وکړي او د افغان ولس بریا یې د اخلاص، تقوا او اطاعت پایله بللې ده.
د بدخشان والي مولوي رحمتالله نجیب هم د شرعي نظام شتون د الله تعالی ستر نعمت بللی او د دې نعمت د شکر ادا کولو غوره لاره یې یووالی او ګډه همکاري ګڼلې ده او له خلکو یې غوښتي، چې د ځینو ډلو د ناسمو غوښتنو او تبلیغاتو تر اغېز لاندې رانشي.
د غونډې ګډونوالو قومي مشرانو د افغان حکومت د خدمتونو او پرمختیايي پروژو د قدردانۍ ترڅنګ، د واخان او یفتل ولسوالیو د سړکونو رغول یاد کړي او په بدخشان کې یې د روغتیا، پوهنې، برېښنا، سړکونو او ځوانانو ته د کاري فرصتونو برابرولو په برخو کې د لا ډېرو خدمتونو غوښتنه کړې ده.