د فارس خبري اژانس د راپور له مخې، د بریتانیا د بهرنیو چارو وزارت د ایران سفارت سرپرست علي نسیمفر احضار کړی او پر تهران یې د یو شمېر ادعاوو په اړه وضاحت ترې غوښتی دی.
د بریتانیا بهرنیو چارو وزارت په یوه اعلامیه کې ادعا کړې، چې د ایران د سپاه پاسداران د قدس ځواک د اروپا په کچه د ځینو بریدونو په تنظیم کې رول لري. لندن ویلي، دغه ډول فعالیتونه د بریتانیا او متحدینو امنیت ته ګواښ دی.
د بریتانیا د بهرنیو چارو وزارت ویاند ویلي، چې هېواد به یې د بهرنیو دولتونو له لوري د ګواښونو پر وړاندې لازم اقدامات وکړي او د خپلو وګړو د ساتنې لپاره به هڅې روانې وساتي.
په اعلامیه کې د بریتانیا وروستیو اقداماتو ته هم اشاره شوې، چې د سپاه پاسداران پر وړاندې د نویو محدودیتونو یادونه پکې شوې ده.
ایران بیا تر دې وړاندې د اروپا په خاوره کې د وسلوالو فعالیتونو د تنظیم او د نورو هېوادونو په چارو کې هر ډول لاسوهنه رد کړې او دغه ډول تورونه یې بېاساسه بللي دي.