برېښنا شرکت: د کاسا زر پروژې د پلې کېدو په تړاو یې د کندوز ځايي مسوولینو سره خبرې کړې

د افغانستان د برېښنا شرکت وايي، د دغه شرکت عمومي اجرائیوي رئیس ملا محمد حنیف حمزه د کندوز له والي نثار احمد نصرت او د استخباراتو رئیس عبدالرشید منېب سره لیدلي او د کاسا زر پروژې لپاره یې د هر ډول اړینو اسانتیاوو په برابرولو ورسره خبرې کړې دي.
له برېښنا شرکت څخه په خپره شوې خبرپاڼه کې ویل شوي، د کاسا ۱۰۰۰ پروژې د غوره پرمختگ لپاره د اسانتیاوو په برابرولو سربېره ځايي اوسېدونکو ته د کار زمینې په برابرولو هم خبرې شوې دي.: «دغه راز د کندوز له ځايي مسوولینو غوښتنه وشوه چې د برېښنا پراختیايي پروژو لپاره د اسانتیاوو په رامنځته کولو او ضایعاتو مخنیوي کې دې بشپړه همکاري وکړي».
د خبرپاڼې له مخې، د افغانستان برېښنا شرکت مشرتابه، غواړي هېواد کې د لویو پروژو پاتې چارو بیا پیل او بشپړولو لپاره هر ډول اسانتیاوې رامنځته کړي او د برېښنا پر ولایتي واحدونو هم منظمه څارنه ولري، څو پېرودونکو ته هر ډول اسانتیاوې رامنځته شي او ټاکلي پلانونه پر وخت په منظم ډول تطبیق شي.
د کاسا ۱۰۰۰ پروژې تاسیسات به په افغانستان کې د ۵۸۰ کېلومترو په اوږدوالي د کندوز له شېر خان بندر څخه د ننگرهار تر تورخم پورې بشپړېږي، د کاسا زر پروژې په مرسته قرغیزستان او تاجېکستان به د یو ۱۲۲۲ کیلومتره د انرژۍ انتقال لیکې پرمټ ۳۰۰ مېگاواټه برېښنا افغانستان ته او ۱۰۰۰ مېگاواټه پاکستان ته لېږدوي.
د کاسا زر پروژه له منځنۍ اسیا د شېرخان بندر له لارې د افغانستان شمال ته ننوځي او له کندوز، بغلان، پنجشېر، کاپیسا، کابل لغمان او ننگرهار له لارې پر تورخم پښتونخوا ته اوړي.
افغانستان به له برېښنا د گټې اخیستنې تر څنگ په کال کې ۴۵ مېلیونه ډالره د برېښنا د ټرانزیت له پلوه هم عاید ولري.