د افغانستان برېښنا شرکت مسوولینو نن په کابل کې د حکومت او اطلاعاتو او رسنیو په مرکز کې د یوې خبري ناستې پر مهال ویلي، چې په تېر یوه کال کې، له گاونډیو هېوادونو د وارداتي برېښنا او د برېښنا تولید کورنیو شرکتونو ته د برېښنا پېر له درکه ټول پورونه ورکړل شوي دي.
د افغانستان برېښنا شرکت د عملیاتي چارو رئیس عبدالرحمن رحماني، په دې خبري ناسته کې وویل: د بلخ، چمتال ولسوالۍ سب سټېشن د رغولو چارې د ۶۸ مېلیونه افغانیو په لگښت بشپړې شوې او نږدې ۱۲۰۰ پېرودونکي له برېښنا څخه برخمن شوي دي.
دغه راز، د شبرغان – دشت الوان ۵۰۰ کیلوولټ برېښنا لېږد مزي د پاتې چارو او دشت الوان سب سټېشن د پراختیا پروژو د بشپړولو هوکړه د افغانستان برېښنا شرکت او د افغان انوېست شرکت ترمنځ لاسلیک شوې چې په بشپړېدو سره به یې سلگونه زره پېرودونکو ته برېښنا ورسېږي.
نوموړي وویل، د غزني – کندهار ۲۲۰کیلوولټ لېږدونکي برېښنا مزي پروژې د پاتې چارو پیلول، د ارغندي- غزني ۲۲۰ کیلوولټ برېښنا لېږد مزي د سرکټ رغول، د نورالجهاد سب سټیشن د ډیزاین، جوړولو او نصب چارو پیلول، د پنجشیر د پارندې برېښنا بند د رغولو چارو پیلول، د میدان وردگو د چک او کونړ د ماڼوگي برېښنا بندونو د پاتې چارو پیلول، د سروبي برېښنا بند د جنراتور ترمیم او د اسعد آباد برېښنا فابریکې د رغونې چارو بشپړېدل، په تېر کال کې د برېښنا شرکت له نورو لاسته راوړنو څخه دي.: «د پرو سږکال پر مهال د میوند ولسوالۍ د برېښنا شبکې او د غزني د ۱۴ پایې ټرانسفرمرونو چارې بشپړې شوي، چې له امله یې په ټولیز ډول ۸ زره پېرودونکو ته برېښنا رسېدلې ده. همدارنگه له عسقلان څخه تر کندوز هوایي ډگر پورې د ۲۲۰ کیلوولټ برېښنا او د کابل له ارغندې څخه تر لوگر، پکتیا او خوست سب سټېشن پورې د نوري فایبر مزي هم رغول شوي دي.»
د رحماني په خبره، پرو سږکال د برېښنا رسونې په موخه په بېلابېلو ولایتونو کې ۲۶۷ پایې استوگنېز ټرانسفرمرونه له شبکې سره نښلول شوي، چې په پایله کې یې ۲۸۳۴۴ پېرودونکي د برېښنا له نعمت څخه برخمن شوي دي.: «د کابل سروبي ولسوالۍ په نغلو سیمه کې د ۲۲.۷۵ مېگاواټو په ظرفیت د لمریزې برېښنا تولید دستگاه د طرحې وروستي کول، د نورالجهاد له سب ستیشن څخه د هرات تر پل هاشمي سب ستیشن پورې د ۲۲۰ کیلوولټ انتقالي مزي غځولو طرحې وروستي کول، د کابل د تره خېلو د ۴۰ مېگاواټو په ظرفیت او د ننگرهارحصار شاهي د ۴۰ مېگاواټو په ظرفیت د لمریزې برېښنا تولید طرحې وروستي کول، په کندهار کې د لمریزې برېښنا ۸۰ مېگاواټه په ظرفیت د دستگاه جوړولو، هرات کې د بادي برېښنا ۲۰۰ مېگاواټه دستگاه جوړولو، بغلان کې د ډبرو سکرو څخه د برېښنا تولید دستگاه جوړولو، هرات، پنجشېر، کونړ او بادغیس کې د نیمه کاره پروژو بشپړولو ته د پانگهالو لېوالتیا، د یاد شرکت له نورو مهمو لاسته راوړنو څخه شمېرل کېږي.»
په دې خبري ناسته کې نوموړي وویل، د برېښنا بېلونو سیستم کې ۴۸۰۰ مېټرونه ثبت شوي، ۴۱۵۶۱ انالوگ مېټرونه ډیجیټل ته تبدیل شوي، چې د ضایعاتو راټېټولو، شبکې اصلاح او د عوایدو کچې لوړوالو برخه کې یې مهم رول لوبولی دی.:«په تېر یوه کال کې له گاونډیو هېوادونو د وارداتي برېښنا او د برېښنا تولید داخلي شرکتونو ته د برېښنا پېر له درکه ټول پورونه ورکړل شوي دي، ازبېکستان ته ۸۶.۹ مېلیونه، تاجیکستان ته ۶۶.۱ مېلیونه، ترکمنستان ته ۳۶.۸ مېلیونه او ایران ته ۳۷.۷ مېلیونه امریکايي ډالر، دغه راز د برېښنا تولید داخلي شرکتونو ته ۴۳۲.۹ مېلیونه افغانۍ او ۱۷.۲ مېلیونه امریکايي ډالر ورکړل شوي دي.»
د یاد شرکت د معلوماتو له مخې، تېر کال کې د څه باندې ۳ مېلیارده افغانیو په ارزښت د برېښنا د ۱۰۴ پروژو تړونونه لاسلیک شوي، د یو مېلیارد او ۱۷۱ مېلیونه افغانیو په لگښت د اجناسو ۲۶ پروژې او د ۶۵.۸ مېلیونه افغانیو په لگښت ۹ ساختماني پروژې پلې شوي دي.
د افغانستان برېښنا شرکت باندې د جمهوریت د وخت مېلیونونه ډالر پور پاتې وو، چې اوس د برېښنا شرکت د هغه وخت پورونه ورکوي.
