یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
امریکايي اشغالګر د بغاوتګرو، په ځانګړې توګه د شر او فساد جبهې لپاره د دوی په وینا د ترهګرۍ په وړاندې قرباني شوي سرتېري دي، هغه سرتېري چې پوره شل کاله یې د افغانستان پر مظلومو ولسونو هېڅ راز ظلم ونه درېغوه.
د شر او فساد جبهې د بهرنیو اړیکو مسؤل علي میثم نظري پر خپله ټویټر/ایکس پاڼه په افغانستان کې د امریکایي اشغالګرو له خوا د کار کولو ورځې په مناسبت د امریکا پخوانیو عسکرو ته خپل درناوی وړاندې کړی.
نوموړي زیاته کړې؛ موږ د هغو کسانو یادونه کوو چې له ۲۰۰۱ څخه تر ۲۰۲۱ کلونو پورې د نړیوال تروریزم پر وړاندې د افغانستان د امنیتي ځواکونو تر څنګ د تروریزم په ضد جنګېدلي دي، د هغوی قربانۍ باید هېڅکله هېره نه شي.
د شر او فساد جبهې دا ذهني ناروغ هغه عسکر د تروریزم په وړاندې جګړې قربانیان نوموي، چې د مسلمانانو په سپیڅلې جهادي مبارزه کې له منځه تللي دي؛ یعنې بُغات د نړیوال اتحاد پر وړاندې په تېر شل کلن جهاد د بطلان کرښه کشوي او په همدې مهال بیا د برنا در یهودي د نږدې همکارانو وسلوالو جګړو ته د جهاد نوم ورکوي.
علي میثم نظري د یادې ورځې په مناسبت د ټرمپ له راتلونکې ادارې غوښتي چې داسې کسان دې وګماري، تر څو د هغه په ټکو، په افغانستان کې له افراطیت او تروریزم سره مبارزه وکړي.
شر او فساد د تورو تیارو هغه لارویان دي، چې پر افغانستان د امریکايانو د شل کلن اشغال له ماتې یې لا عبرت نه دی اخیستی، لا هم امریکايي پوځیانو ته تمه لري چې د یوې بلي ډالري جګړې ویاړ ور وبښي او د هغوی په ملتیا د افغانستان د لوټمارۍ چارو ته له درې کلن ځنډ وروسته بیا ځل ادامه ورکړي.
میثم څو ورځي وړاندې ټرمپ ته د مبارکۍ پیغام کې ویلي وو، چې طالبان له (۲۱) ترهګرو ډلو سره یو ځای په افغانستان کې د خپل ځواک او منابعو د لاسته راوړلو لپاره له بې بنسټه سیاستونو څخه کار اخلي؛ له دې کبله باید ښکېلتیا ورسره ختمه او اوونیز مالي ملاتړ یې پای ته ورسېږي.
میثم په خورا سپین سترګۍ هېروي، چې د امریکا لخوا افغانستان ته ټولي راتلونکي ډالري کڅوړې د بشري مؤسساتو لپاره راځي او هغوی یې بې ځایه شویو، سیلاب ځپلو او کډوالو باندې مصرفوي. په دې اړه امریکايي چارواکو هم په کانګرس کې وضاحتونه ورکړي، خو بغاوتګر هغه ړانده دښمنان دي، چې د مادي ګټو لپاره هیڅ معنوي ارزښتونه او اخلاقي پولي نه مراعتوي.
میثم په خورا عجز په خپل پیغام کې له ټرمپ غوښتنه کړې وه، چې د دغه فسادګري ډلې همکاري وکړي او دده په الفاظو “د دواړو هېوادونو(امریکا او افغانستان) د امنیت او سولې د ټینګښت او تروریستي ګواښونو د مخنیوي په برخه کې اقدامات ترسره کړي”.
بغاوتګرو، چې په پرځېدلي جمهوریت کې یې لسګونه جنرالان او زرګونه اجیر عسکر د واشنګټن د ګټو لپاره وجنګول او په اخر کې یې داسې شرمېدلې ماتې وخوړه، چې له بهرنیو همکارانو وړاندې تر کولاب، پاکستان او نورو کمپونو تېر شوي وو؛ بیا ځل امریکا ته ډاډګیرنه ورکوي چې د واشنګټن ګټي به خوندي کړي.
بغاوتګرو ته د اسلام او هېواد په ځای د واشنګټن ګټې ارزښت لري او د مظلومو مسلمانونو پر ځای د امریکايي اشغالګرو قربانۍ؛ شر او فساد جبهه غواړي په دغه نا کاره ارزښتونو امریکا بیا ځل جګړې ته زړه ښه کړي او د دوی لپاره هغه دفاع وزارت بیا ځل ونیسي، چې لسګونه پلاستیکي جنرالانو یې د ډالري معاشاتو اخیستلو تر څنګ، د موقف په زور د هېواد ملي شتمنۍ لوټولې.
