شېر کړئ Facebook Twitter بریښنالیک Telegram WhatsApp بلوڅ بېلتون پالو (BLA) په خپل نشراتي ادرس «هکل ميډيا» د تېرو شپږو مياشتو د بريدونو يو ځانګړی انفوګرافيک خپور کړی او ادعا یې کړې چې د ۲۰۲۵ کال په لومړیو شپږو میاشتو کې یې ۲۸۴ وسله وال بریدونه کړي او د يادو بريدونو پر مټ یې ۶۶۸ پاکستاني پوځيان او ۵۸ جاسوسان وژلي او ۳۷۳ نور ټپيان کړي دي.د بلوڅ بېلتون پالو په راپور کې راغلي چې د روان کال د شپږو میاشتو د بریدونو شمېر د تېر کال د ټولو بريدونو له شمېر سره برابر دی او ګواښ یې کړی، چې په لا شدت او ستراتيژيکو پلانونو سره به روان کال خپل بريدونه نور هم زيات او پراخ کړي.د خپرو شويو ارقامو له مخې بلوڅ بېلتونپالو په تېرو شپږو مياشتو کې د ۷۲۶ کسانو د وژلو سربېره ۲۹۰ کسان ژوندي نیولي، ۱۲۱ بمي بريدونه یې ترسره کړي، ۱۳۱ پوځي وسایط یې ویجاړ کړي او یو اورګاډی یې تښتولی دی.بلوڅ بېلتون پالو همدا راز ویلي چې په دغو شپږو میاشتو کې یې نهه ځانګړي عملیات ترسره کړي، چې درې یې ځان تېري بریدونه وو او په ياده موده کې یې ۳۶ جنګیالي هم وژل شوي دي.د معلوماتو له مخې بلوڅ بېلتون پالو تېرې شپږ مياشتې د بلوچستان په بېلابېلو سیمو کې تر ۴۵ زیاتې پوستې او سیمې تر خپل کنټرول لاندې راوستي، ۱۷ پوځي تاسیسات یې په بشپړه توګه له منځه وړي او دغه راز یې تر ۱۱۵ زياتې ډول ډول وسلې هم نيولې دي.ياده دې وي چې د پاکستان پوځ او دوی ته منسوب رسنيو تر دې دمه د بلوڅ بېلتون پالو د خپرو شويو شمېرو رد يا هم تاييد نه دی کړی او نه یې په اړه څه ويلي دي.
