لویدیځ رسنيو راپور ورکړی، چې فرانسه کې د ژوند د ورځنیو لګښتونو د لوړېدو او عامه خدمتونو د کمزورتیا پر ضد پیل شوي لاریونونه په تاوتریخوالي اوښتي او د لاریون کوونکو او پولیسو ترمنځ نښته رامنځته شوې ده.
د فرانسې یو شمېر ښارونو کې ۲۷۲ کسان نیول شوي دي.
د فرانسې ولسمشر امانوېل مکرون د دغو تاوتریخجنو اعتراضونو په غبرګون کې ویلي، چې په جمهوریت کې د تاوتریخوالي ځای نهشته. وایي، پر دولتي ادارو او هټیو بریدګر او لوټماران به مجازات شي.
دغه لاریونونه تېره میاشت د ښوونځیو په ګډون په بېلابېلو برخو کې د عامه خدمتونو د خرابوالي په غبرګون کې پیل شوي دي.
په همدې حال کې، بلجیم، پرتګال او ایټالیا کې هم د ژوند د لګښتونو د لوړېدو پر ضد او په البانیا کې بیا د فساد، بېکارۍ او د ښوونې او روزنې د خراب وضعیت پر ضد لاریونونه پیل شوي دي.