پرون د پښتونخوا بنو ولسوالۍ کې د بیلابیلو سیاسي او مذهبي ګوندونو زرګونه کسان د پاکستان د نويو پوځي عملیاتو پر ضد راوتي وو.
د پاکستان حکومت د عزم استحکام په نوم پوځي عملیات منظور کړي چې ښایي ژر پیل شي، خو ښکاري چې د ولس له لوی مخالفت سره مخ دي.
موده وړاندې چې د پاکستان لوړ پوړو سیاسي – پوځي مشرانو یاد عملیات منظور کړل، نو پر ضد یې په پارلمان کې بحثونه وشول او د پښتونخوا په ځینو سیمو کې خلک سړکونو ته راووتل.
تازه په بنو کې هم زرګونه کسان د یادو عملیاتو پر ضد راوتلي وو چې د پوځي عملیاتو، پوځي بدمعاشۍ او فساد پر ضد یې شعارونه ورکول.
سناتور مشتاق احمد خان لاریون کوونکو ته ویلي چې په خپله خاوره د پوځ عملیات نه غواړي؛ هغه ویلي چې ولس یې د پوځ د امریکا د ډالري جګړو پر ضد دی او اجازه به ور نه کړي چې د پښتنو خاوره د ترهګرۍ ښکار شي.
د بنو د امن پر پاڅون د پوځ له لوري ډزې شوي چې څو تنه وژل شوي او له شلو ډیر ټپیان شوي دي.
نن هم د پروني پاڅون د دوام له پاره خلک سړکونو ته راوځي تر څو د عملیاتو مخالفت او د امن غوښتنه وکړي.
د پښتون ژغورنې غورځنګ او عوامي نشنل ګوند هم د لاریون ملاتړ اعلان کړی دی چې دا به په پوځ د لار زیات فشار لامل شي.
داسې ښکاري چې د پښتونخوا ولس دا ځل په ډیر جدیت او شدت سره د پوځ د عملیاتو مخه نیول غواړي.
د پاکستان پوځ وړاندې هم د پښتنو په سیمو کې عملیات کړي چې عام ولس ته په کې سخت مالي او ځاني زیانونه رسیدلي وو.
د پوځ وروستیو سیاستونو او د ولس نارضایتی او قهر ته په کتو ډیر احتمال شته چې د بنو پاڅون سخت شي او ښایي چې نورو سیمو ته هم وغځیږي.
که پوځ د ولس غوښتنې و نه مني، نو د بنو پاڅون کولی شي چې پاکستان د لا ډیرې بې ثباتۍ په لور یوسي او هغه واټن چې د پوځ او ولس تر منځ موجود دی، نور هم ژور شي.
د ولس زور د خدای زور وي او که چیرې پوځ د بنګله دیش له تجربې زدکړه و نه کړي، نو لرې نه ده چې د بنګله دیش د بیلتون تاریخ به بیا تکرار شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.