جعل، دروغ او دوکه هېڅکله هم تلپاتې نه وي. یوه ورځ به حقیقت د هغو پر بنسټ جوړ شوي ټول جوړښتونه له منځه یوسي؛ لکه لمر چې تل د وريځو تر شا نه پټیږي، دروغ هم د همېش لپاره ژوندي نه پاتې کېږي او عمر به یې پای ته رسېږي.
افغانستان یو داسې هېواد دی چې ډېر کلونه یې د همدې ډول لویو دروغو په سیوري کې تېر کړي، یو شمېر هېواد پلورونکو په بېلابېلو نومونو او عنوانونو، د هېواد د آبادۍ او پرمختګ په پلمه دې خاورې ته قدم ایښی و؛ خو په حقیقت کې یې د سترو دروغو تر شا پناه اخیستې وه. دوی د خپلو خلکو او هېواد د ګټو پر ځای، پر هغو لارو روان وو چې دښمنانو غوښتل او له ملي او ولسي ګټو سره په ټکر کې وو.
خو دغه جعل او تزویر ډېر دوام ونه کړ او پای ته ورسېد. بالآخره حقیقت د سرښندنو او قربانیو په مټ د دروغو له تورو وريځو راووت او دا شریف ملت له واقعیت سره مخامخ شو. ولس درک کړه چې د څو کلونو لپاره یې پر ناسمو کسانو حساب کړی و.
همدا راڅرګند شوي حقایق د دې لامل شول چې افغانستان په پای کې د داسې حکومت تر واک لاندې راشي، د آبادۍ رنګ او بوی واخلي چې خلکو خپله خوښ کړی او منلی دی.
له دې سره سره، هماغه ورانکارې او ګډوډي اچوونکې ډلې همېشه د دروغو تر شا پټې پاتې شوې، د جعل په لوري یې منډې وهلې او د دې هېواد د دښمنانو د ناپاکو لاسونو وسیله شوې دي، دوی یو ځل بیا د جعلي واک، شهرت او شتمنۍ د ترلاسه کولو لپاره هر ډول هڅې کوي.
نه له ورانۍ او ویجاړۍ لاس اخلي او نه د دې ملت د ځوانانو ژوند ورته ارزښت لري چې پرېږدي خپل برخلیک پخپله وټاکي او سم ژوند وکړي. هغوی ځوانان په بېلابېلو دوکو او چلونو داسې ډګر ته داخل کړي چې پایله یې ماتې او تسلیمېدل دي، د دې ډګر ماتې خوړونکي یوازې همدوی دي، نه هغه څوک چې له لرې تحریکول کوي، بې ګناه او بې پرې خلک داسې کارونو ته اړ باسي چې عاقل انسان یې هېڅکله نه کوي.
که څه هم دا ډله خلک د پرېکړو کولو او د چارو د ادارې له کړۍ څخه شړل شوې او د خلکو لعنت او کرکه یې په ارزانه بیه ترلاسه کړې ده، خو لا هم ځانونه اصلي صاحبان او تلپاتې ملګري معرفي کوي. یو کس پر یوه څوکۍ کېنوي، بل ته بله څوکۍ وربښي او له لوړې رتبې څخه ټیټې ته امرونه صادروي او منع کول کویث. دوی له دې حقیقت څخه ناخبره دي چې نه د خلکو په زړونو کې ځای لري او نه په میدان کې څوکۍ؛ نه د دوی دغه سخاوت د چا زړه ګټلی شي او نه د چا روح ته سکون وربښلی شي.
دا ټول د خلکو په وړاندې د ناپوهۍ د تدبیرونو او د قصدي رسوايۍ له نندارې پرته بل څه نه دي؛ ځکه دغه هوښیار ملت په ښه توګه درک کړې ده چې عمر یې د همدې منفورې ډلې تر واکمنۍ لاندې ضایع او تباه شوی دی. اوس چې ولس آزادي، خپلواکي او امنیت ترلاسه کړي، هېڅکله به اجازه ورنه کړي چې هماغه کسان بېرته راستانه شي، دسیسې جوړې او اندېښنې خپرې کړي، د خلکو عمر، پانګه او فرصتونه د خپل ځانونو لپاره ولګوي.
نه به د هغوی جعلي خوځښتونه کوم اغېز ولري او نه د تشو عنوانونو وېش او تقسیم کولای شي د نفوذ او اغېز لپاره لاره پرانیزي، ترڅو په بې ساه تنو کې خوځښت او په بې روحه کالبدونو کې ساه وچلوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.