د فلسطین حماس اسلامي غورځنګ وايي که صهيونيستي اسرائيل په غزه نور بريدونه وکړي او يا هم نظامي فشار زيات کړي نو په غزه کې نیول شوي اسرائيلي بندیان به “په تابوت کې” اسرائیلو ته ور کړل شي.
ياد غورځنګ خبرداری ورکوي چې غزې ته د صهيونيستي اسرائيلو د نور نږدې کېدو په صورت کې به دوی خپلو مجاهدينو ته د بنديانو د ساتنې په باب نوې لارښوونې وکړي چې يوه به یې هم د يادو بنديانو په تابوتونو کې بېرته اسرائيلو ته استول وي.
د حماس اسلامي غورځنګ د القسام لېوا وياند ابو عبيده د صهيونيستي اسرائيلو د لومړي وزير بنيامين نتنياهو د دې خبرو په ځواب کې چې «حماس به د شپږ وژل شويو اسرائيلي بنديانو خورا دروند قيمت پرې کړي» دوه ورځې وروسته پرون دوشنبه وويل د اوربند او تبادلې پرځای د نتنياهو په جګړې فشار د دې په معنا ده چې دوی د بنديانو د ژوندي ساتلو او مرګ تر منځ د دوی مرګ انتخاب کړی دی، او د يادو بنديانو کورنۍ بايد انتخاب وکړي چې د دوی خلپوان ژوندي ورولېږل شي که يا هم مړه.
د ښاغلي عبيده له لوري په خپره شوې خبرپاڼه کې راغلي: «نتنیاهو او پوځ یې د بندیانو د تبادلې د مخنیوي په خاطر د بندیانو د مرګ بشپړ مسؤل دی.»
د بنديانو د وژلو موضوع وروسته له هغې خپره شوه چې شپږ اسرائيلي بنديان د غزې په تونلونو کې مړه وموندل شول او په غبرګون کې یې نتنیاهو د دوشنبې په ورځ په یوه تلویزیوني خبري کنفرانس کې اسرائیلي ولس ته وویل: “زه له تاسو څخه بخښنه غواړم چې دوی یې ژوندي نه دي راوړي،موږ نږدې وو، خو بریالي نه شوو، حماس به د دې لپاره خورا دروند قیمت ورکړي.
د حماس غورځنګ یوه جګپوړي چارواکي عزت الرشیق بيا د دوی له لوري د يادو شپږو بنديانو د وژلو تور رد کړ او وې ويل چې، ياد شپږ تنه بندیان د اسرائیلو په هوايي بریدونو کې وژل شوي دي او د مړينې مسوليت یې اسرائيلو ته راجع کېږي.
په همدې حال کې په اسرائیلو کې د بندیانو د وژل کېدو په اړه اعتراضونه دوام لري او قهرجنو لاريونوالو ویلي چې که د نتنیاهو حکومت له حماس غورځنګ سره اوربند لاسلیک کړی وای، ښايي دا اسرائيلي بنديان ژوندي راستانه شوي وای.
