تسنیم اژانس د ځينو معتبرو يمني سرچينو له قوله راپور ورکړی، چې د يمن حوثیانو د سعودي عربستان پر ځينو سيمو بريدونه ترسره کړي او په «ضمد» ښار کې زورورې چاودنې اورېدل شوې دي.
یمني سرچینې وایي، د سعودي عربستان په جنوب کې د «خمیس مشیط» هوايي اډه هم د هغو هدفونو له ډلې وه چې د یمني ځواکونو تر برید لاندې راغلې ده.
حوثیانو ياد بريدونه وروسته له هغې کړي، چې د سعودي عربستان په مشرۍ ګډ ائتلاف د يمن حديدې ولايت کې حوثي ځواکونه او ځينې ملکي سيمې په نښه کړې.
حوثیانو په اعلامیه کې ويلي «محاصره به د محاصرې، بندرونه به د بندرونو او هر ډول کړکېچ به له ورته غبرګون سره مخ شي.» د دوی په وینا، که د سعودي بریدونه دوام وکړي، نو لا ډېر زیانونه به ورواړوي.
د سعودي عربستان او حوثيانو ترمنځ کړکېچ وروسته له هغې زیات شو، چې حوثیانو په سره سمندر او بابالمندب تنګي کې د سعودي اړوند بېړیو د تګ راتګ د بندولو ګواښ وکړ.