الجزیرې راپور ورکړی، چې د فلسطین اسلامي مقاومت غورځنګ (حماس) خلیل الحیه د خپل سیاسي دفتر د نوي مشر په توګه ټاکلی دی.
الجزیرې ویلي، حماس د دوشنبې په ورځ د داخلي ټاکنو پایله اعلان کړه، چې له مخې یې خلیل الحیه د رایو په ترلاسه کولو سره د غورځنګ د سیاسي دفتر مشري وګټله او د پخواني مشر یحیی السنوار ځای ناستی شو.
د راپور له مخې، الحیه په ټاکنو کې ۳۵ رایې ترلاسه کړې، په داسې حال کې چې د حماس د بهرني دفتر مشر او پخوانی سیاسي مشر خالد مشعل ۳۴ رایې اخیستې دي.
الجزیرې زیاته کړې، حماس د یحیی السنوار له شهات وروسته د جګړې په شرایطو کې د چارو د مدیریت لپاره موقتي مشرتابه شورا جوړه کړې وه، خو اوس یې د نوي مشر په ټاکلو سره خپل سیاسي جوړښت بېرته منظم کړی دی.
خلیل الحیه د حماس له مهمو مشرانو څخه دی او د غزې د جګړې پر مهال یې د حماس د مذاکراتي پلاوي مشري کوله. د الجزیرې د معلوماتو له مخې، نوموړی له دې وړاندې د حماس د سیاسي دفتر غړی او د عربي او اسلامي اړیکو د برخې مسوول هم پاتې شوی دی.