وحیدالدین حیدر
د ا.ا.ا د راتګ له ورځې وروسته د دوام او تغیر د پالیسۍ په بنیاد د وطن ابادۍ ته ملا وتړله، دغه مرحله د افغان د عمراني چارو د تشدید مرحله هم بللی شو.
د افغانستان اسلامي امارت په نظامي، سیاسي، اقتصادي او فرهنګي چارو کې عملیاتي فازونه او برخې راټینګې کړې، په نظامي برخه کې یې امنیتي تشکیلات پراخ کړل، امنیتي پوستې، حوزې او چکپواینټونه یې زیات کړل، نظامي عملیات یې په لار واچول، بغاوتګر او خارجي دسیسي یې مهار کړې، نظامي تشکیلات یې منظم کړل، خیالي بستونه یې ختم کړل د تشکیلاتو تورم او پړسوب یې ورغاوه.
په سیاسي برخه کې یې خپلې سیاسي حلقې جوړې کړې، د افغانستان سیاست یې دریو مهمو حلقو یعنې ګاونډیو، سیمې او نړۍ هېوادونو سره تعریف او ترسیم کړ، ترڅو د افغانستان د ملي ګټو په رڼا کې د افغانستان کورني او بیروني سیاست ته مسیر ورکړي.
د دې سربېره یې سیاسي کمیسون هم ایجاد کړی چې ګڼ سیاسي او کادري خلک یې وطن ته راوستل.
په اقتصادي فاز کې یې اقتصادي کمیسون ایجاد کړ، د افغانستان د لسګونو بندونو فازونه زیات شول، که د کوم بند ظرفیت ټیټ و د هغه ظرفیت لوړ شو، که د کوم بند کارونه نیمکله پاتې و هغه کارونه یې بشپړ شول، لسګونه زره هکتاره ځمکه له للمي آبي شوه، لسګونه کانالونه وکیندل شول، په جریبونو هکتاره سوزنده دښتې تر اوبو لاندې شوې، بیدیاوې او صحراګانې را زرغونې شوې، باغونه او زراعتي ځمکې پکې تطبیق شوې.
فضايي کورېډورونه وساتل شول، د بندرونو سوداګریز ارزښت لاپسې لوړ شو، د ګاونډیو او د سیمې له هیوادونو سره د ترانزیټ چارې پارچاو نشوې، نوي سوداګریز بازارونه ایجاد شول د افغانستان تاجکستان، د افغانستان ترکمنستان او افغانستان ایران ګډ سوداګریز بازارونو کې د یادو هېوادونو توکي د پلور لپاره عرضه شول.
د ایران سره یو ډېر لوی او عمده تړون د درملو، کرهڼې او باغدارۍ په برخه کې امضا شو چې نږدې راتلونکي کې د افغانستان بنسټیزې ستونزې ورسره حلیږي.
همدا ډول د اوبو د مدیریت او د کرهنې د ځمکو پراخولو په برخه کې کم ساری کار وشو، د قوشتیپې له کاناله یې واخله په مختلفو ولایتونو کې د چکډیمونو تر جوړولو او د فرعي کانالونو تر کیندلو پورې موثر او اغیزمن اقدامات وو او په ترڅ کې یې لکونه جریبه للمې ځمکه تر اوبو لاندې شوه او تر دې وروسته په ځمکو بدلې شوې او د کال دوه یا درې فصله پېداوار به ځنې ترلاسه کیږي.
د لویو لارو پر ترمیم او پراخولو په سرعت کار روان دی. د کندهار لویه لار د سالنګ سړک، د کابل تورخم لار باندې تازه د کار بهیر پیل شو.
په لرې پرتو غرنیو سیمو کې سړکونه وکیندل شول او درجات یې له ښارونو سره وصل کړل، یوه دره یې بلې سره وصل کړه په هغو لارو به چې په څارویو اکمالات کېدل اوس د هر کور تر دروازې موټر ورځي او هغه خلک خپل تولیدات په اسانۍ بازارونو ته رسوي.
زموږ درې کلن مزل بې دمې و او افغانستان به له بیرونۍ تکیې راوځي، موږ هر څه درلودل مګر راسخې ارادې په چا کې نه وې اوس هم هرڅه لرو د خپل د وطن د ابادۍ او د احتیاج څخه د راوتلو تکل، اراده او فولادي هوډ لرو.
موږ د قوي ایمان په ډاډ په خدای توکل کړی د وطن خپلواکۍ مو تضمین شوه اوس نو وار را رسیدلی ترڅو ګټلی وطن او ګټلې خپلواکۍ وساتو.
دا رسالت نهایت سخت دی مګر ناممکن نه دی.وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.