د دفاع وزارت په یوه خبرپاڼه کې ویلي، چې افغان دفاعي ځواکونو د تېرې یوې میاشتې په ترڅ کې د هېواد په بېلابېلو سرحدي سیمو کې د کشفي او امنیتي عملیاتو پر مهال ۱۶ قاچاقبران نیولي او د نشهيي توکو، وسلو، مهماتو، طبي درملو او لسګونو موټرو په ګډون یې د قاچاق لویه محموله ضبط کړې ده.
د وزارت د خبرپاڼې له مخې، په نیول شویو توکو کې ۱۸ کیلوګرامه شیشه، ۲۳۰۰ ګرامه اپین، ۸ میله کلاشینکوفونه، ۲ میله روسي پیکاوې، ۷ میله M4 وسلې، ۱۲ قبضې تفنګچې، ۲۶۲ فیره بېلابېل ډوله درنې مرمۍ، ۹ کارټنه طبي درمل او تجهیزات، ۶ موټرسایکلونه او ۵۶ عرادې موټرونه او د موټرو پرزې شاملې دي.
دفاع وزارت وایي، یادو قاچاقبرانو غوښتل دا توکي په غیرقانوني توګه له افغانستان څخه بهرنیو هېوادونو ته ولېږدوي، خو د دفاعي ځواکونو له لوري یې هڅې شنډې او ټول نیول شوي کسان د قانوني اجراآتو لپاره عدلي او قضايي ارګانونو ته سپارل شوي دي.