رویټرز خبر ورکړی، چې د روسیې د بهرنیو چارو وزارت ویاندې ماریا زاخارووا ویلي، که اروپايي هېوادونه پر روسیه برید وکړي، له اروپا سره به رامنځته کېدونکې جګړه «ډېره لنډه» وي او مسکو به د خپل ټول موجود پوځي توان په ګډون له اټومي وسلو کار واخلي.
زاخارووا ویلي، روسیه اروپايي هېوادونه نه ګواښي، خو د نوموړې په وینا، مسکو د هر ډول احتمالي برید د مخنیوي او د بریدګر د ماتولو لپاره لازمې وړتیاوې لري.
نوموړې دا څرګندونې داسې مهال کړي، چې د روسیې او اروپايي هېوادونو ترمنځ د اوکراین د جګړې او د کییف لپاره د لوېدیځ د پوځي ملاتړ له امله ترینګلتیا زیاته شوې ده. راپورونه وایي، چې مسکو د کالینینګراد د احتمالي محاصرې په صورت کې د اټومي وسلو د کارولو خبرداری ورکړی دی.