حامد رهګذر چې اصلاً د پروان ولایت اوسېدونکی دی، د پرځېدلي جمهوري حکومت پر مهال د حمد الله محب او اشرف غني کمپاینر او د ټولنیزو رسنیو فعال و؛ په ایران سفارت کې یې د ۲۰۲۳م کال تر فیبروري میاشتې پورې دنده درلوده، کله چې سفارت طالبانو ته وسپارل شو، سفارت کې یې دنده پرېښوده؛ بیا څو میاشتې وروسته شمالي امریکا ته لاړ او هلته اوسېږي.
حامد رهګذر اوس مهال د شمالي ټلوالې، په ځانګړې توګه د عطا محمد نور نږدې کس او همفکره دی؛ هغه انځور یې ډېر مشهور شو چې له ایران سفارت څخه یې د احمد شاه مسعود انځور له سفارت څخه د مقاومتیانو د جنازې په ډول وایست.
نوموړي د دې جبهې دننه له ډېرو بدګومانیو، ابهاماتو او اختلافونو څخه پرده پورته کړې ده.
حامد رهګذر په دې وروستیو کې د هندوکشغږ له خوا د مقاومت په نوم جبهې د فعاله غړي قاري عیسی او د ازادۍ جبهې د مرستیال عبدالستار حسیني د جنجالي مکالمې افشا کېدو ته په اشارې ویلي، چې دې چارې د یادې او نورو جبهو دننه پر یو بل د بدګومانیو، ابهاماتو او بې باوریو لمن لا پسې پراخه کړې ده.
نوموړي ویلي چې حسیني تر اوسه د خپلې دې جنجالي مکالمې په اړه هېڅ وضاحت نه دی ورکړی او د دې مکالمې افشا کېدو ته په کتو، داسې ښکاري چې ان د جبهې د رهبرۍ په کچه کسان له طالبانو سره مهم معلومات شریکوي چې ښې بېلګې یې د دې مکالمې افشا کېدل او دغه راز په دې وروستیو کې په بغلان ولایت کې د طالبانو لاس ته د قوماندان داوود لوېدل وو.
نوموړي د یادې او نورو جنګي جبهو اوسني غړي او رهبري د مشکوکه بلل او زیاته کړې یې ده: «هيله ده چې جنګي جبهې د داسې شخصيتونو په لټه کې شي چې د سياسي تقوا او د طالبانو په وړاندې د مبارزې ښه مخينه ولري، نه د داسې کسانو چې په ظاهر کې يوه خبره کوي او په پټه بله کړنه لري.»
رهګذر دغه راز زیاتوي چې طالبانو په رسنیو کې په خپل فعاله او قوي حضور سره د عامه ذهنیت مدیریت په خپل کنټرول کې اخیستی دی.