د صنعت او سوداګرۍ وزارت خبر ورکړی، چې ازبکستان د وزیرانو شورا د سپکو صنایعو د پراختیا ادارې رییس ناظمجان خالمرادوف په مشرۍ د دې هېواد د دولتي او خصوصي سکتور پلاوی نن (چهارشنبه) کابل ته را ورسېد.
سرچینې زیاته کړې، چې یاد پلاوی به له افغان چارواکو سره وګوري، د سوداګریزو اړیکو په کنفرانس کې به ګډون وکړي او د افغان او اوزبک سوداګرو ترمنځ به سوداګریزې غونډې وکړي.
د صنعت او سوداګرۍ وزارت د معلوماتو له مخې، ازبک پلاوی به په بلخ او کندوز ولایتونو کې له نساجي کارخونو او نورو صنعتي برخو څخه هم لیدنې وکړي.