د ملي دفاع وزارت وایي، د دغه وزارت د بېلابېلو قطعاتو او جزوتامونو څخه ١٦٥ تنه ځوان منسوبین د حضرت ابوعبیده بن جراح (رض) ملي دفاع پوهنتون اړوند حضرت اسامه بن زید د ځوانو افسرانو اکاډمۍ له څلورمې دورې شپږ میاشتني مسلکي او پوځي زدهکړو څخه نن د یو لړ مراسمو په ترڅ کې فارغ شول.
د یاد وزارت د خبرپاڼې لهمخې، په یادو مراسمو کې د ملي دفاع وزارت د تعليماتو او پرسونل معينيت مرستیال مولوي بازمحمد حمیدي په ګډون ګڼو پوځي چارواکو ګډون کړی وو.
مسئولینو نویو فارغانو ته په وینا کې ویلي: « لکه څرنګه چې د جهاد په وخت کې اطاعت فرض وو، همداسې اطاعت اوس هم درباندې فرض دی. د خپلو مشرانو اطاعت وکړئ، له صبر څخه کار واخلئ او استقامت د ځان عادت وګرزوئ؛ تاسو ته د ټول مسلمه امت سترګې دي او تاسې د اسلامي نظام ساتونکي یاست! په خپلو ټولو امورو کې د خدای”ج” رضا هدف وګرځوئ کاميابي د دنیا او اخرت به ستاسو وي.»
بل خوا تازه فارغ شویو افسرانو له اسلامي نظام څخه دفاع او ساتنه د ځان مسؤولیت بللی او مسؤولینو ته يې ډاډ ورکړی چې د اسلامي نظام لپاره به هېڅکله له قربانۍ څخه درېغ ونکړي.