بهرنيو چارو وزارت وايي، چې د ياد وزارت وزیر مولوي امیر خان متقي او د هند د بهرنیو چارو وزیر جې شنکر په ټيلیفوني خبرو کې د هند او افغانستان ترمنځ د دوو اړخیزو اړیکو پر پیاوړتیا، تجارت او د ډیپلوماتیکو اړیکو د کچې پر لوړولو خبرې کړي.
د سرچينې په خبره ښاغلي متقي هند د سیمې مهم هېواد ګڼلی، له افغانستان سره يې اړیکې تاريخي بللي او د متوازن سياست په خپلولو یې له ټولو لوريو سره پر مثبتو اړيکو ټينګار کړی.
د معلوماتو له مخې مولوي امير خان متقي همداراز افغان سوداګرو او ناروغانو ته د هند د ویزو په ورکړه کې د اسانتیاوو او په هند کې د افغان بندیانو د خلاصېدو او هېواد ته د راستنولو غوښتنه کړې.
له بل لوري د هند د بهرنیو چارو وزیر جې شنکر ويلي، چې هېواد به يې له افغانستان سره خپلو همکاریو ته دوام ورکوي او په سیاسي او اقتصادي برخو کې يې پر ګډ کار ټينګار کړی.
جې شنکر همدا ډول د بندیانو قضیو ته د ژر رسېدنې او د ویزو په برخه کې د اسانتیاوو راوستلو ژمنه کړې او پر دې سربېره دواړو لوریو د چابهار بندر په پراختیا هم ټينګار کړی.