اسرائیلو په خپل ګاونډ کې ځپونکي بریدونه پیل کړي؛ موده وړاندې اسرائیلو په غزې ناتار شروع کړ، د غزې له غمیزې وروسته یې ایران وویشته او هلته یې د حماس د سیاسي دفتر مشر اسماعیل هنیه په شهادت ورساوه.
له دې وړاندې یې په دمشق کې د ایران کونسلګرۍ هم ویشتلې وه چې په ترڅ کې یې ١٦ تنه ووژل؛ په وژل شویو کې د ایران سپاه پاسداران مخکښ قومندان محمد رضا زاهدي هم شامل و.
د دې برسېره د ایران د ولسمشر الوتکه نسکورول او په هغه کې یې ولسمشر او د بهرنیو چارو وزیر د اور د لمبو خوراک کېدل سناریو لا پای ته نه وه رسېدلې چې په لبنان کې یې زرګونه کسانو ته د مخابرو د چاودنو په ترڅ کې مرګ ژوبله واړوله چې د قربانيانو په ډله کې ایرانیانو هم شتون درلود.اوس یې یوځل بیا په لبنان هوایي برید کړی چې د حزب الله د ډلې مشر حسن نصرالله په کې له منځه لاړ.
حسن نصرالله ته د حزب الله د ډلې مشري له ١٣٧٠ کال څخه ور له غاړې وه چې دې ډلې به د ایران په ملاتړ د اسرائیلو صهونیستي رژیم په وړاندې وسلواله مبارزه کوله.
د ځینو رسنیو د راپورونو په اساس ویل کېږي چې د ایران حکومت د دوی مذهبي مشر یو خوندي ځای ته لېږدولی.
تېره ورځ د ملګرو ملتونو په سازمان کې نهه اوویایمه سرمشریزې اجلاس کې کله چې د اسرائیلو د صدراعظم د خبرو وار را ورسېده د ګڼو هېوادونو استازو د اسرائیلو د وروستیو سرکښیو په غبرګون کې تالار ترک کړ او د دې هېواد صدراعظم خالي چوکیو ته وینا وکړه.
ایران هم له اسرائیلو سره په ناندریو اخته دی چې سیاسي شنونکي یې زرګري جګړه بولي؛ ایران وایي دوی به په سړه سینه او په وخت اسرائیلو ته غاښ ماتوونکی ځواب ورکړي، مګر په ایران هره ورځ امنیتي کمربند په تنګېدو دی او هره ورځ یې ځمکنۍ بشپړتیا تر تعرض لاندې راځي.
اسرائیل په نظامي میدان کې خپله محاسبه لري او جګړه په محاسبو ولاړه ده، د اسرائیلو تر شا ټول غربي قوتونه ولاړ دي؛ ایران به هم خپله محاسبه لري چې ان ګاونډیان ترې خوښ نه دي، په تش میدان خالي لاسونه ولاړ دی، نو ځکه یې د دښمن درنو څپېړو ته خپل مخ نیولی.
سړی باید خپل امکانات او د دښمن امکانات محاسبه کړي، خپل وسایل او د دښمن وسایل پرتله کړي، خپل اقتصاد او د دښمن د اقتصاد بیلانس باید وګوري، خپل نظامي ظرفیت او د دښمن نظامي ظرفیت باید ورته معلوم وي؛ ممکن ایران دا محاسبه کړې وي، نو ځکه یې جګړه یوازې تندو او تریخو څرګندونو پورې محدوده ده.
ایران یوځل خپل قوت ازمایلی وو چې متاسفانه هغه برید یې د اسرائیلو د دفاعي چتر په مرسته خنثی شو.
له ایران سره تر اوسه پورې د لبنان حزب الله ډله ولاړه ده او د حماس ملاتړ ورسره دی؛ ترڅنګ یې د یمن حوثیان هم ورسره خواخوږي لري، خو دا یوازې نظامي چریکي ډلې دي چې له ایران سره کلکې ولاړې دي، اما د دولتونو په سطحه ښکاره او علني ملاتړ نه لري.
له اسرائیلو سره ټوله ناټو او غربي قوتونه هم ولاړ دي، د هندوستان فوځي او مالي ملاتړ هم ورسره دی، ان د اسلامی جمهوریه پاکستان فوځ یې هم په خدمت کې دی.
د پردې تر شا یې ترکان هم وخت نا وخت مرسته کوي، د ترکیې مرستې له اسرائیلو سره د سیاسي رول له مخې کېږي.
ترکیه غواړي چې په سیمه کې خپل رسوخیت وساتي؛ په اسرائیل، مصر، لبنان، دمشق او اردن خپله خبره ومني، یا دا هم ممکن وي چې ترکیه دې له اسرائیلو وېره ولري؛ کېدای شي چې ترکیه د اسرائیلو د شر څخه د نجات په موخه د پردې تر شا د دوی سره د اړیکو دړه نیمکښه پرانستې وي.
که چین، روسیه او شمالي کوریا د اسلامي نړۍ ملاتړ ته شین څراغ وښایي، د اور دا لګېدلي بڅرګي به په منځني ختیځ کې تم نه شي، نړۍ به راساً درېیمې وژونکي جګړې ته داخله شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.