نړۍوالو رسنیو د خپلو سرچینو په حواله راپور ورکړی، چې اسرائیلي اشغالګرو په رفح ښار باندې تېره شپه بریدونه پیل کړل.
دا بریدونه وروسته له هغه کیږي، چې د اسرائیلو کابینې پر رفح باندې د پوځي عملیاتو اجازه ورکړه.
تر دې بریدونو وړاندې حماس ډلې اعلان وکړ، چې د غزې په جګړه کې د اوربند لپاره یې د مصر او قطر لخوا وړاندیز شوې طرحه منلې ده.
حماس په یوه خبرپاڼه کې ویلي، چې د دې ډلې د سیاسي دفتر مشر اسماعیل هنیه د قطر له لومړي وزیر او د مصر د امنیت له مشر سره په ټیلیفوني خبرو کې د دغه پلان د منلو اعلان وکړ.
اسرائیلي چارواکو په رفح تر بریدونو وړاندې هم ویلي و، چې حماس د مصر لخوا د اوربند د وړاندیز تعدیل شوې طرحه منلې چې دوی ته د منلو نه ده.
نړۍوالې رسنۍ داسې مهال په رفح د اسرائیلي یرغلګرو د بریدونو خبر ورکوي، چې د دوی لخوا د پیل شويو بریدونو له امله تر دې وخته څه باندې ۳۴ زره فلسطینیان وژل شوي او نږدې ۸۰ زره نور ټپیان شوي دي. د دغې جګړې زیات شمېر قربانیان ښځې او ماشومان دي.
