د افغانستان بانک وايي، د پېرودونکو د پیسو د ورکړې پروسې د اسانتیا، د خلکو د مالي ستونزو د حل او د غوره بانکي فعالیتونو او خدمتونو د وړاندې کولو لپاره ټول سوداگریز بانکونه او د بهرنیو بانکونو انفرادي حسابلرونکي کولی شي تر دې وروسته په اوونۍ کې ۱۵۰ زره افغانۍ او همدارنگه د ډالري حسابونو مشتریان په اوونۍ کې دوه زره امریکایي ډالر رایستلی شي.
له یاد بانک څخه په خپره شوې خبرپاڼه کې ویل شوي، انفرادي بانکي حسابونو کې د پیسو ویستلو مبلغ له اویا (۷۰،۰۰۰) زره افغانیو څخه په اوونۍ کې (۱۵۰،۰۰۰) زره افغانیو ته لوړ شو او همدارنگه ډالري حسابونو کې په اوونۍ له زر (۱۰۰۰) امریکایي ډالرو څخه دوه (۲۰۰۰) زره امریکایي ډالرو ته لوړ شو.: «انفرادي بانکي حسابونو کې د پیسو ویستلو مبلغ له دوه سوه او پنځوس (۲۵۰،۰۰۰) زره افغانیو څخه په میاشت کې پينځه سوه (۵۰۰،۰۰۰) زره افغانیو ته لوړ شو او همدارنگه ډالري حسابونو کې له درې زره (۳۰۰۰) امریکایي ډالرو څخه شپږ (۶۰۰۰) زره امریکایي ډالرو ته لوړ شو.»
د خبرپاڼې له مخې، شرکتي حسابونو کې د پيسو ویستلو مبلغ له ۵ سلنې څخه ۱۰ سلنې ته لوړ شو، په دې شرط چې یاد مبلغ په میاشتني ډول له دوه سوه زره (۲۰۰،۰۰۰) امریکایي ډالرو یا معادل یې په افغانیو څخه لوړ نه شي، له دې وړاندې دا محدودیت سل زره (۱۰۰،۰۰۰) امریکایي ډالر وو.:«هغه انفرادي بانکي حسابونه چې بیلانس یې له شل زره (۲۰،۰۰۰) امریکایي ډالرو یا یې معادل په افغانیو څخه پورته نه وي، د ویستلو لپاره یې هېڅ ډول محدودیت نهشته او هغه شرکتي بانکي حسابونه چې بیلانس یې له دېرش زره (۳۰،۰۰۰) امریکایي ډالرو او یا یې معادل په افغانیو څخه پورته نه وي، د یاد مبلغ د ویستلو لپاره هېڅ ډول محدودیت نشته.»
د یادونې وړ ده هغه کسان چې په بانکونو کې نوي حسابونه پرانیزي هېڅ ډول محدودیت نشته او د افغانستان بانک ټولو هېوادوالو ته ډاډ ورکوي چې په نږدې راتلونکي کې به د ټولو حسابونو څخه محدودیتونه په ټولیز ډول لرې کړي، ترڅو د بانکي سکتور ټول فعالیتونه عادي حالت ته را وگرځوي او په دې وسیله د درنو هېوادوالو لپاره د اړینو خدمتونو د وړاندې کولو زمینه برابره کړي.
