د هرات ولایت مقام وایي، له نږدې دوو کلونو تخصصي څېړنو او تخنیکي ارزونو وروسته د هرات ښار ماسټر پلان بشپړ او د افغان حکومت د ریاستالوزراء له لوري تصویب شو.
یاد ماسټر پلان د کور او ښارجوړونې وزارت او هرات ښاروالۍ په همکارۍ چمتو شوی، چې په راتلونکو کلونو کې به د هرات د ودې او پراختیا مسیر وټاکي.
د دې پلان له مخې، د هرات د نوي ښار د پراختیا لپاره پر شاوخوا ۵۰ زره جریبه ځمکه ستره پروژه په پام کې نیول شوې ده.
د هرات ښار په نوي ماسټر پلان کې د ښاري سړکونو او مواصلاتي شبکو معیاري کول، د صنعتي سیمو پراختیا، د بار وړونکو موټرو ترمینلونو او لوژستیکي مرکزونو جوړول، د ترافیکي ګڼې ګوڼې کمول، د شنو سیمو او پارکونو پراختیا، او د اوبو رسولو او فاضله اوبو د شبکو پیاوړتیا شامل دي.
همداراز، د هرات تاریخي او فرهنګي سیمو ساتنه، د نویو کاري فرصتونو رامنځته کول، د کورنیو او بهرنیو پانګونو جذب، او د غیرمعیاري ودانیزو چارو مخنیوی هم د دې جامع پلان له مهمو اهدافو څخه یاد شوي دي.