امنیتي سرچینې وایي، چې د افغانستان د لومړني ستورمزلي او پیلوټ عبدالاحد مومند، جنازه نن (دوشنبه، د چنګاښ ۱۵مه) د جرمني له مونشن ښار څخه کابل نړۍوال هوایي ډګر ته راورسېده.
د نوموړي جنازې ته د افغان حکومت یو شمېر مسؤلین، د مرحوم عبدالاحد مومند د کورنۍ غړي، خپلوان او ګڼ شمېر کابل مېشتي د کابل هوایي ډګر ته ورغلي دي.
د مرحوم مومند جنازه د افغان حکومت د بهرنیو چارو، دفاع او ترانسپورټ او هوايي چلند وزارتونو په همغږۍ کابل ته راولېږدول شوې ده.
عبدالاحد مومند د افغانستان لومړنی ستورمزلی و، چې د ۱۳۶۷ لمریز کال په ترڅ کې یې فضا ته تاریخي سفر ترسره کړی و او د هېواد د علمي او هوايي تاریخ له مهمو شخصیتونو څخه ګڼل کېږي.