د امریکا د استازو جرګې پخوانۍ مشرې نانسي پلوسي د ایران پر وړاندې د ډونالډ ټرمپ د حکومت د شپږ میاشتني پوځي عملیاتو سختې نیوکې کړې او دا جګړه یې «ناوړه تېروتنه» بللې ده.
پلوسي ویلي، دغه جګړه چې تر اوسه یې د امریکا لسګونه پوځیان وژلي او له ۷۵۰ ډېر نور یې ټپیان کړي، له شپږو میاشتو وروسته هم د امریکا هېڅ ستراتیژیک هدف نه دی ترلاسه کړی. هغې د جګړې د میلیاردونو ډالرو لګښتونو په یادولو سره د ټرمپ عملیات «لویه ماتې» بللې دي.
په ورته مهال، د رویټرز او اسوشیټېډ پرېس د راپورونو له مخې، د جګړې دوام د امریکا لپاره سیاسي، اقتصادي او پوځي فشارونه زیات کړي، په داسې حال کې چې ایران لا هم خپل نظامي توان ساتلی او د جګړې د پای لپاره روښانه ستراتیژي نه ده رامنځته شوې.