نیویارک ټایمز راپور ورکړی، چې د امریکا مرستیال ولسمشر جيډي وینس له لوړپوړو پوځي قوماندانانو سره په مستقیمو خبرو کې د ایران د جګړې د وضعیت په اړه معلومات ترلاسه کړي او د جګړې د اوږدېدو، د وسلو د زېرمو د کمېدو او د عملیاتو د دوام په اړه یې له ولسمشر ډونالډ ټرمپ سره اندېښنه شریکه کړې ده.
د راپور له مخې، وینس له پوځي قوماندانانو غوښتي چې د جګړې د وضعیت په اړه له سیاسي ملاحظاتو پرته خپله واقعي ارزونه وړاندې کړي. په دغو خبرو کې د امریکايي ځواکونو د تلفاتو، د ایران د جګړې د دوام وړتیا، په هرمز تنګي کې د تهران د احتمالي اقداماتو او د امریکا د وسلو د زېرمو په اړه بحث شوی دی.
امریکايي پوځي چارواکو د پټریوټ دفاعي سیستم د توغندیو د زېرمو د پام وړ کمېدو په اړه هم خبرداری ورکړی او ویلي یې دي چې د ځینو نورو مهماتو، په ځانګړي ډول د «اټکمز» توغندیو، ذخیرې هم ټیټې کچې ته رسېدلې دي.