مخالفین په غربي رسنیو کې چیغې وهي چې دا سفرونه «د مشروعیت لپاره نمایشي» دي، خو په حقیقت کې د دوی وېره د خپل حیثیت د بشپړ له منځه تلو او په تاریخ کې د خپل نوم له هیرېدو څخه ده. د متقي هر بریالی سفر، د مخالفینو پر بې اعتبارۍ او بې اغېزمنتوب یو نوی سند دی.
د اوسني حکومت پالیسي د پخوانیو نظامونو برعکس، د تړاو پر بنسټ نه، بلکې د خپلواکۍ او ملي عزت پر محور ولاړه ده. امارت نه پر ختیځ متکي دی او نه پر لویدیځ، بلکې د «برابر تعامل» په اصل باور لري. کله چې د چین، هند، روسیې او ایران په څېر هېوادونو له کابل سره عملي تعامل ته مخه کړې ده، معنی یې دا ده چې نړۍ د افغانستان نوی حقیقت منلی دی، که څه هم یو شمېر لا هم د پرون په خوبونو کې ډوب دي.
هغه څه چې دښمنان تر ټولو ډېر سوځوي، همدا دی؛ نړۍ له اوسنیو افغان واکمنانو سره په خبرو کې ده، نه له هغوی(مخالفینو) سره. د افغانستان د لا ډیرو بندیزونو لپاره د دوی هڅې په حقیقت کې د هغه ملت څخه غچ اخیستل دي چې نور پرې باور نه لري. هغه کسان چې یو وخت یې د «ډیموکراسۍ» په شعار سره د خپلو ډکو جیبونو په لټه کې وو، نن د غصې او حسرت تر سیوري لاندې، د ملي اقتدار د بیرته راستنېدو شاهدان دي.
هو، د امیر خان متقي سفرونه له مسکو څخه تر نوي ډهلي پورې، د افغانستان د بهرنۍ پالیسۍ د نوي فصل نښه ده؛ یو داسې فصل چې د عقلانیت، عزت او خپلواکۍ پر بنسټ جوړ شوی دی. مخالفین، که په پاکستان کې وي او که په غربي پلازمینو کې، کولی شي چیغې ووهي او تورونه پورې کړي، خو د تاریخ لاره روښانه ده؛ د افغانستان اوسنی حکومت په پیاوړو ګامونو سره په سیمه او نړۍ کې د هېواد رښتینی حیثیت بیرته راوړي او د خاینانو او وطن پلورونکو لپاره به یوازې شرمیندګي پاتې شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
