د ایران ولسمشر مسعود پزشکیان وايي، د هېواد ټولې مهمې پرېکړې د ستر مذهبي مشر، مجتبی خامنهاي، د لارښوونو پر بنسټ ترسره کېږي.
پزشکیان ویلي، له ستر مذهبي مشر سره د لیدنو پر مهال د «نه جګړې او نه سولې» حالت د پای ته رسولو پر اړتیا ټینګار شوی دی.
د نوموړي په وینا، دښمن د خپلو جنګي موخو په ترلاسه کولو کې له ناکامۍ وروسته خبرو اترو ته اړ شو، او په مذاکراتو کې د ایران لاسته راوړنې تر تمې ډېرې وې؛ خو واشنګټن وروسته له خپلو ژمنو سرغړونه وکړه.
هغه زیاته کړې، چې ځینې کورنۍ څرګندونې د خبرو اترو لاسته راوړنې کمې ښيي او ټینګار یې کړی چې د ایران هڅې باید د «بېغورۍ څرګندونو» له لارې له پامه ونه غورځول شي.