العربيه د وال سټریټ ژورنال له قوله خبر ورکړی، چې د اسراییلو استخبارات ادعا کوي، چې ایران د یورانیمو د بډاینې زرګونه ماشینونه د «جبل الفأس» یا «پکاس» غره دننه تونلونو ته لېږدولي دي.
وال سټریټ ژورنال د امریکايي او اسراییلي چارواکو په حواله ویلي، تهران دغه تجهیزات د ۲۰۲۵ کال له ۱۲ ورځنۍ جګړې وروسته غرونو ته انتقال کړي، کومه جګړه چې په ترڅ کې یې د ایران پر اټومي تأسیساتو درانه امریکايي او اسراییلي بریدونه شوي وو.
د راپور له مخې، د دغو وسایلو تر ځمکې لاندې انتقال د دې اندېښنې لامل شوی، چې ایران ښايي خپل اټومي فعالیتونه له نړیوالې څارنې پټ، بېرته فعال کړي. راپور وايي تهران هڅه کړې چې پاتې تجهیزات له احتمالي بریدونو او ویجاړېدو خوندي وساتي.