ايراني رسنيو خبر ورکړی، چې د ایران د لوړپوړي مرکچي باقر قالیباف په مشرۍ د دې هېواد يو پلاوی د دوشنبې ورځ ناوخته قطر ته رسېدلی.
سرچينو د ياد سفر موخه، له امریکا سره د جګړې د پای ته رسولو لپاره په «ډیپلوماټیک بهیر» کې برخه اخيستل ياد کړي.
د معلوماتو له مخې، په دغه پلاوي کې د ایران د بهرنیو چارو وزیر عباس عراقچي او د مرکزي بانک رئیس عبدالناصر همتي هم شامل دي.
د ایران د پارلمان رئیس محمدباقر قالیباف د بهرنیو چارو وزیر عباس عراقچي او د مرکزي بانک له رئیس سره قطر ته ناڅاپي سفر کړی.
په ورته مهال په نړيواله کچه د دې سفر په اړه بېلابېل اټکلونه کېږي؛ ځینې رسنۍ د ایران د کنګل شویو شتمنیو د ازادېدو موضوع یادوي او ځینې نور بیا د اټومي پروګرام او د هرمز تنګي امنیت د خبرو اصلي محور بولي.