د بشري حقونو نړيوال بنسټ (IHRF) د یوه راپور په خپرولو سره ویلي، چې د خوست ولایت د علیشېرو ولسوالۍ د صدیق غراب په سیمه کې د پاکستاني ځواکونو د ادعا شوي توپچي برید له امله درې ماشومان شهيدان شوي او لږ تر لږه شپږ نور ملکي وګړي ټپیان شوي دي.
د راپور له مخې، دغه پېښه د جون د ۱۰مې نېټې په سهار وختي رامنځته شوې او برید پر یوې ملکي استوګنیزې سیمې لګېدلی دی.
دې بنسټ ویلي، چې په عام مېشتو سیمو کې د درنو وسلو کارول د نړیوال بشردوستانه قانون او د بشري حقونو د اصولو د احتمالي سرغړونو په اړه جدي اندېښنې راولاړوي.
ياد بنسټ زیاته کړې، چې دا پېښه د افغانستان په یو شمېر سرحدي ولایتونو کې د تکراري بریدونو د لړۍ برخه بلل کېږي، چې له امله یې ملکي وګړو ته مرګژوبله اوښتې او کورونه یې ویجاړ شوي دي
یاد بنسټ له ملګرو ملتونو، د بشري حقونو له شورا او د جرمونو له نړیوالې محکمې (ICC) غوښتي چې د دغو پېښو په اړه هر اړخیزې څېړنې ترسره او د مسؤلو کسانو د حسابورکولو لپاره لازم اقدامات وکړي.