د بهرنیو چارو وزارت وایي، د افغانستان د هوايي حریم د نقض او د ملکي وګړو پر کورونو د بمبارۍ په تړاو یې کابل کې د پاکستان د سفارت شارژدافیر احضار او خپل شديد او قاطع اعتراض ورته وړاندې کړ.
د بهرنیو چارو وزارت په وینا، افغان حکومت دغه تېری او بشري جنایت د نړیوالو اصولو او قوانینو ښکاره نقض بولي، په کلکو ټکو یې غندي او یو ځل بیا ټینګار کوي چې د خپلې خاورې دفاع او د ولس امنیت تأمینول خپل شرعي مسئولیت ګڼي.
یاد وزارت ټینګار کړی، چې پاکستانی لوری دې د نیابتي سیاستونو د تطبیق پر ځاى خپلو داخلي ستونزو ته په اساسي ډول حل ومومي.
د هېواد بهرنیو وزارت وړاندې زیاته کړې، چې د دغو تکراري پاروونکو اقداماتو او جنایتونو د ټولو پايلو مسئولیت به د پاکستان پوځي رژیم پر غاړه وي.
د یادونې ده، چې د پاکستان پوځي رژیم تېره شپه چې پر خوست، پکتیکا او کونړ ولایتونو هوایي بریدونه وکړل چې له امله یې د ۱۱ ماشومانو په ګډون ۱۴ تنه شهیدان او ۱۴ نور ټپیان شول.