د پاکستان په بلوچستان ایالت کې بلوڅو د گوادر په بندر کې پرلت وهلی او له پاکستاني حکومت یې غوښتي چې د دوی نیول شوي کسان دې خوشې کړي او هغو پرلت کوونکو ته دې اجازه ورکړي، چې گوادر ته راتلل، خو د حکومت له لوري یې د تگ مخه نیول شوې ده.
«بلوڅ یکجهتي کمېټې» پر اېکسپاڼه(پخواني ټوېټر) یوه اعلامیه خپره کړې، چې پاکستاني ریاست پر پرلت کوونکو ډزې کړي چې له امله یې یو تن وژل شوی او ۷ نور ټپیان شوي دي.
په اعلامیه کې ویل شوي، د جولای په ۲۸مه دوی(بلوڅانو) پرلت کاوه؛ خو د ریاستي ترهگرۍ، بربریت او وحشت له امله دوی اوس دغه پرلت تر نامعلومې نېټې غځوي.:«په گوادر کې د گرځبندیز سربېره زرگونه کسان د بلوڅو په قومي غونډه کې راټول شوي او زرگونه خلک په لارو کې ودرول شوي او هغوی همالته پرلت وهلی دی.»
د بلوڅو قومي اعلامیې له مخې، په گواد کې انټرنېټ پرې شوی، موبایل کار نه کوي او پولیسو او پوځ پر پرلت کوونکي ډزې کړي، چې له امله یې اتو تنو ته مرگژوبله اوښتې ده.
د پاکستان حکومت د بلوڅو قومي پرلت کوونکو ته ویلي، چې خبرو کولو ته د پاکستان د قانون له مخې چمتو دي؛ خو د لاریون په نوم چاته د عامه بنسټونو ته د زیان رسولو اجازه نه ورکوي.
په گوادر کې د بلوڅ یووالي«بلوچ يکجهتي کمېټې» له خوا رابلل شوې احتجاجي غونډې مشري د بلوڅانو د حقونو لپاره مبارزه کوونکې ماهرنگ بلوڅ ویلي، موخه یې د هغو ستونزو لپاره غږ پورته کول دي، چې سیاسي گوندونه ورباندې پټه خوله دي او غږ نه پورته کوي.
له تېرې اوونۍ راهیسې په ګوادر کې حالت ورځ تر بلې کړکېچن کېږي.
گوادر ته زرگونه بلوڅان ورمات شوي چې د بلوڅو په قومي پرلت کې برخه واخلي؛ خو د پاکستان د پوځ له لوري اجازه نه ورکول کېږي او له موټرونو ښکته کېږي.
د بلوچستان بلوڅ له تېرو وختونو راهیسې له پاکستاني حکومت سره لاس او گرېوان دي.
بلوڅ ملتپال وسلهواله مبارزه کوي او سولهییز لاریون کوونکي له پاکستاني حکومت د خپلو حقونو غوښتنه کوي.
بلوچستان د طبیعي زېرمو او د گوادر بندر لرونکی ایالت دی، خو د دغه ایالت پر طبیعي زېرمو پنجاب ولکه لگولې او بلوڅو ته پکې حق نه ورکوي.
بلوڅ قومي خوځښت وايي، د بلوڅو زرگونه ځوانان، مشران او سپینږیري د پوځ له لوري لادرکه شوي، چې دوی ته یې د مرگ او ژوند هېڅ معلومات نه کېږي او نه هم امنیتي ادارې دوی ته په دې اړه معلومات ورکوي.
