د بهرنیو چارو وزارت په یوه خبرپاڼه کې ویلي، چې د یاد وزارت وزیر مولوي امیرخان متقي د افغانستان لپاره د ناروې شاهي دولت له نوي ټاکل شوي چارسمبالي، سیګوالډ ټومن هاګ، سره په کتنه کې د دواړو هېوادونو د تاریخي اړیکو پر پیاوړتیا او د دوهاړخیزو همکاریو پر پراختیا خبرې کړې دي.
د بهرنیو چارو وزارت د معلوماتو له مخې، ښاغلي متقي نوموړي ته په خپل نوي ماموریت کې د بریا هیله کړې او د دغه وزارت له لوري یې د هر اړخیزې همکارۍ ډاډ ورکړی دی.
په ورته مهال، د ناروې نوي ټاکل شوي چارسمبالي د افغانستان له لوري د ښه کوربهتوب او همکاریو مننه کړې او د امنیت، نشهيي توکو پر وړاندې د مبارزې او اقتصادي ثبات په برخو کې یې د افغان حکومت لاسته راوړنې او پرمختګونه ستایلي دي.