د بهرنیو چارو وزارت ویلي، چې د یاد وزارت وزیر مولوي امیرخان متقي په مسکو کې د روسیې د امنیت شورا له منشي سرګي شویګو سره لیدلي او د دواړو هېوادونو د اړیکو، سیمهییز امنیت، د نشهيي توکو پر وړاندې د مبارزې او امنیتي همکاریو په اړه یې خبرې کړې دي.
د وزارت په وینا ښاغلي متقي د افغانستان او روسیې د سیاسي اړیکو د مثبت بهیر یادونه کړې او د افغان حکومت د رسمیت پېژندنې له امله یې د روسیې له رهبرۍ مننه کړې. نوموړي د امنیتي همکاریو او منظمو مشورو د پیاوړتیا ترڅنګ، د اقتصادي او سوداګریزو اړیکو پر پراختیا هم ټینګار کړی دی.
د وزارت د معلوماتو له مخې، شویګو ویلي د افغانستان او روسیې اړیکې په بېلابېلو برخو کې د پراختیا په حال کې دي او د امنیت او نشهيي توکو د مخنیوي په برخه کې یې د افغانستان د وضعیت مدیریت مثبت بللی دی. نوموړي ټینګار کړی چې د دواړو هېوادونو ترمنځ به سیاسي مشورو او عملي همکاریو ته دوام ورکړل شي.