د بهرنیو چارو وزارت په خبرپاڼه کې ویلي، چې د یاد وزارت وزیر مولوي امیرخان متقي په مسکو کې د روسیې د لومړي وزیر له مرستیال الکسي اوورچوک سره لیدلي او د دواړو هېوادونو د سیاسي تفاهم ترڅنګ یې د اقتصادي، سوداګریزو، ترانزیټي او انرژۍ همکاریو د پراختیا په اړه خبرې کړې دي.
متقي د افغانستان او روسیې د سیاسي اړیکو د مثبت مسیر یادونه کړې او د افغانستان په اړه یې د روسیې د مثبت سیاست له امله د دغه هېواد له رهبرۍ مننه کړې ده.
نوموړي ټینګار کړی چې موجود سیاسي تفاهم باید په عملي اقتصادي شراکت بدل شي او په سوداګرۍ، سیمهییز اتصال، روسي پانګونې، انرژۍ، کانونو او بانکي او تادیاتي اسانتیاوو کې دې ګډې همکارۍ پراخې شي.
اوورچوک د اقتصادي همکاریو په برخه کې د روسیې چمتووالی څرګند کړی او ویلي یې دي چې د عملي همکاریو د پیل لپاره مناسب شرایط برابر شوي دي.
نوموړي د ترانزیټ، ترانسپورټ او انرژۍ په برخو کې له افغانستان سره د ګډ کار پر پراختیا ټینګار کړی او د تېر کال د سوداګرۍ د پام وړ زیاتوالي یادونه یې کړې ده.