د بهرنیو چارو وزارت په یوه خبرپاڼه کې ویلي، چې د دغه وزارت وزیر مولوي امیرخان متقي د سره صلیب نړیوالې کمېټې (ICRC) د عملیاتي چارو له عمومي رئیسې، یاسمین پراز ډسیماز، سره کتلي دي.
د لیدنې پر مهال د افغانستان پر بشري اړتیاوو، د راستنېدونکو کډوالو د زیاتېدونکي شمېر اړوند مسایلو، روغتیايي خدمتونو او د جګړې له تېرې دورې څخه پر پاتې ستونزو او اړتیاوو خبرې شوې دي.
په لیدنه کې ټینګار شوی، چې افغانستان له اوږدې جګړې وروسته د پرمختګ، آبادۍ او اقتصادي ودې نوي پړاو ته داخل شوی، خو د تېرې جګړې د قربانیانو ځینې ستونزې او اړتیاوې لا هم پاملرنې ته اړتیا لري.
دواړو لوریو په بېلابېلو برخو کې د سره صلیب نړیوالې کمېټې د بشري همکاریو پر دوام او پراختیا هم خبرې کړي او د هېواد د اړتیاوو د ښه درک، همغږۍ او په روغتیايي او نورو بشري برخو کې د همکاریو د لا پراختیا لپاره یې پر ګډ کار او همکارۍ ټینګار کړی.